भांगरभूंय | प्रतिनिधी
हायरसेकंडरी खातीर बांदतले नवी इमारत
पणजी : पेडणें सरकारी उच्च माध्यमिक विद्यालयाच्या इमारतीचो अहवाल दिवपाक भौशीक बांदकाम खात्याच्या अधिकाऱ्यांनी कळाव केल्ल्यान मुख्यमंत्री डॉ. प्रमोद सावंत हांणी अधिकाऱ्यांक उजरावन काडले. जीर्ण जाल्ले इमारतीची तात्पुरती दुरुस्ती करपा सयत नवी इमारत बांदपाचो निर्णय जाला. आमदार जीत आरोलकार हांणी उच्च माध्यमीक विद्यालयाच्या प्राचार्यां सयत मुख्यमंत्री डॉ. प्रमोद सावंत हांची भेट घेतली. ह्या वेळार नवी इमारत बांदपाचो निर्णय मुख्यमंत्री डॉ. प्रमोद सावंत हांणी जाहीर केलो.
आमदार जीत आरोलकार हांणी ही म्हायती दिली. पेडणें उच्च माध्यमीक विद्यालयाची इमारत जीर्ण जाल्या. हाची दुरुस्ती पयलींच जावपाची गरज आशिल्ली. भौशीक बांदकाम खात्यान इमारतीचे दुरुस्ती कडेन आडनदर केली. अहवाल लेगीत सादर करपाक कळाव केलो. आतां मुख्यमंत्री डॉ. प्रमोद सावंत हे पेडणें उच्च माध्यमीक विद्यालय इमारतीची पळोवणी करतले. सध्याच्या इमारतीची दुरुस्ती जातली. दुरुस्ती जाले उपरांत नव्या इमारतीचें बांदकाम सुरू जातलें. नवी इमारत पुराय जाले उपरांत पोरणी इमारत मोडटले.
पेडणें उच्च माध्यमीक विद्यालयाची इमारत 1975 वर्सा बांदिल्ली. पुराय पेडणें म्हालांतले विद्यार्थी ह्या विद्यालयांत शिकपाक येतात. इमारतीक लागून चड विद्यार्थ्यांक प्रवेश दिवप शक्य जायना. 400 विद्यार्थ्यांक प्रवेश दिले उपरांत प्रवेश बंद करपाची वेळ येता. हाचेर उपाय म्हूण नवी सुसज्ज इमारत बांदपाचो निर्णय जाला. तशेंच 50 लाख रुपया खर्च करून इमारतीची दुरुस्ती जातली. नवी इमारत जाय मेरेन पोरण्या इमारतींत वर्ग घेवप शक्य जावपाक जाय, अशें आमदार जीत आरोलकार हांणी सांगलें.
पालक शिक्षक संघाचे वांगडी, उच्च माध्यमीक विद्यालयाची प्राचार्य राहेश्री रेडकार आनी भौशीक बांदकाम खात्याच्या अधिकाऱ्यां सयत आमदार जीत आरोलकार हांणी मुख्यमंत्र्यांची मंत्रालयांत भेट घेवन चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
