भांगरभूंय | प्रतिनिधी
पुराय धर्तरेक उर्बा दिवपी सुर्यदेवाची उपासना करपा खातीर मकरसंक्रांत ही परब मनयतात. सुर्य जेन्ना कर्क राशींतल्यान मकर राशींत वता तेन्ना ताका मकरसंक्रांत म्हणटात. तीळ आनी गोड हांच्यो स्नेहगुणाचो सण म्हणजेच मकरसंक्रांत. सुर्याचें आगमन दरवर्सा 14 वा 15 जानेवारीक मकर राशींत जाता. हिंदू धर्मांत हाका खूब म्हत्व आसा. ह्या दिसा दरेकलो हिंदू गोंयकार आपलें घर आनी सरभोंवतणचो वाठार नितळ करता. घरा भायर सुंदर रांगोळीन शुभ लाभ अक्षरां घालपाची प्रथा आसा. आम्याचें तोरण हुंबऱ्याचेर बांदतात. रांदचे कुडींत सुगरण बायलो खमंग जिनस करपांत गुल्ल आसतात. देवाची पुजा करतकच कावळ्याक काकोळ घालतात. गायेक पान दाखयतात.
संक्राती दिसा भटमामाक आपोवन सुगडाची पुजा करतात. सुगड म्हणल्यार मातयेच्या ल्हान रंगीत बुडकुल्यान पंचधान्य म्हणल्यार तांदूळ, गंव, नासणें, भात, चणें, मूग घालून तो पाटार दवरतात. ताका हळद कुकुम, फुलां घालतात. पंचारत, एकारत, कापराची आरत दाखयतात. तांची पुजा करतात. मागीर लुगडाच्या पदरान ते पवित्र वाण भटमामाक दितात.
दुसरे दीस किंक्रांत. थंयच्यान रथसप्तमी मेरेन बायलांचो खुब आवडीचो हळडीकुकूम सुरू जाता. ती थारायिल्ल्या दिसा आपापल्या घरांत हळडीकुकूम करतात. एकमेकांचेर वतात. वाड्या वयली बायल आपल्या घरांत आयली काय तिका हळदकुकूम लावन तिळगूळ, चणे, फुटाणे दितात. वाण म्हणून वस्तु दितात. कांय जाणां प्लास्टीक वस्तू, थोडीं कड्डणाचीं, साकरेचीं पाकिटां दितात. हे रितीक लागूनच बायलांची एकमेकां कडेन वळख जाता. तांचे मदीं स्नेहसंबंद वाडटा. विचारांचें दिवप घेवप जाता. हळडीकुकूम म्हणल्यार एकामेकां विशीं आपुलकाय उक्तावपाचें प्रतीक, स्नेहसंबंद जुळोवपाचो एक सुवाळो. थोडीं बायलां धालांचो मांड, देवळाचो मंडपांत सामुदायिक हळदकुकुम करतात. एकमेकांक कपलाक लावन फुलां, चणें फुटाणें, तिळाचे लाडू दितात. थोडीं रक्कम जमोवन एखादे संस्थेक दान करतात.
संक्रांतीच्या दिसा बायलांनी दानधर्म करप, भुकेल्यांक परवडटा तशें दान करपाक जाय. थोडीं बायलां सर्त लायतात. शेजान्नीन १०रुपयांचें वाण दिलें जाल्यार ती ५० रुपयांचें वाण दिता. सर्तीचें युग अजून चालू आसा. एकामेकां वांगडा सर्त लावूं नाकात. हळदकुकूम दिवप, घेवप हें सौभाग्याचें देणें. ओगीच भरपूर खर्च करूं नाकात. हजारांनी रुपया खर्च करचे परस थोडी बचत करून ते पयशे गरिबांक दियात. दान केल्ल्यान ताचें पुण्य तुमकां ह्याच जल्मात मेळटलें.
–
सिद्धी तिळवे
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
