भांगरभूंय | प्रतिनिधी
दिल्लींत कुलकुल्याच्या पडिल्ल्या शिंयांत सद्या वेंचणूक प्रचारान बरोच नेट धरला. पांच फेब्रुवारीक दिल्ली विधानसभे खातीर मतदान जातलें. वट्ट राजकी वातावरण बरेंच तापलां. फुडल्या कांय दिसांनी गरमी आनीक वाडटली, आनी दिल्लीची गादी जिखपा खातीर आप, भाजप आनी काँग्रेस हे तीन मुखेल पक्ष एकामेकांचे मानगुटेर बशिल्ल्याचें दिसून येतलें. दिल्लीत भारतीय जनता पक्ष आम आदमी पार्टीक आडायत? हो खरो प्रस्न आसून काँग्रेस पक्षाची त्या कामा खातीर भाजपाक कितली मेरेन मजत जावंक शकतली हाचीय चर्चा आसा. ‘इंडी’ आघाडीतले दोन घटक पक्ष आशिल्ले आम आदमी आनी काँग्रेस हे दोगूय दिल्ली विधानसभा वेंचणुकेच्या रिंगणांत एकामेकांचे सात जल्मांचे दुस्मान जावन एकामेकां आड उबे रावल्यात. ताचोच फायदो घेवपाचो भारतीय जनता पक्षाचो सद्य यत्न दिसता. मतदारांक फुकट रेवड्यो वांटपाक आम आदमी पार्टीन व्हड आघाडी घेतल्या आनी ताचे फाटोफाट काँग्रेसीचो नंबर लागता. प्रत्यक्ष मतदान फक्त वीस-बावीस दिसांचेर आयिल्लें आसतनाय भाजपा कडल्यान अजून निदान फुकट रेवड्यांचें वांटप जाहीर जाल्लें नासलें तरी मतदारांची नस बरे पैकीं वळखून आशिल्ल्या भाजपा कडल्यानूय ऐन खिणांत अशो घोशणा जावंक शकतात की आप आनी काँग्रेस ताचे कडेन पळयत रावपा बगर आनीक कसलोच पर्याय उरचो ना. त्रिकोणी लडत टाळपा खातीर आप आनी काँग्रेस हांचे कडल्यान कांय ठोस यत्न जावंक नात अशें म्हणूंक येवचें ना, पूण दोनूय पक्ष निमाणें एकामेकांक धडो शिकोवपा खातीर हट्टाक पेटले आनी ताचो राजकी लाव भाजपाक जावचो ना अशें खात्रीन कोणूच सांगूक शकचो ना.
आम आदमी पार्टी फाटलीं धा वर्सां अधिकाराचेर आसा, आनी सरकार चलोवपी ह्या पक्षाक, तांच्या फुडाऱ्यांक बदनाम करपाची एकूय संद केंद्रांतल्या भाजपान सोडली ना. भ्रश्टाचारा आडचे लडायेचो नारो दीत धा वर्सां आदीं सत्तेर आशिल्ल्या आम आदमीच्या फुडाऱ्यांक भ्रश्टाचारान घेरिल्ले सारकी परिस्थिती फाटलीं चार पांच वर्सा निर्माण जाली आनी ताचो फायदो घेवपा खातीर भाजप सिद्ध जाल्ल्याचीं चिन्नां सद्या दिसतात. अरविंद केजरीवाल हो आम आदमीचो चेरो आशिल्ल्यान तांकां सोरो आनी शिशमहल घोटाळ्यांत चडांत चड बदनाम करतना भाजपान हातचे कांयच राखून दवरलें ना. अरविंद केजरीवाल खूबसो तेंप बंदखणींत रावन आयल्यात. केजरीवाला उपरांतचे फळयेंतले आनीक तीन चार जाणूय बंदखणीचें वारें खावन आयिल्ल्यान आत्मविस्वासान मतदारां मुखार वचप तितलें सोंपें नाशिल्लें. पूण सेगीत जाहीर जाल्ल्यो फुकट रेवड्यो आनी नरेंद्र मोदी हांचे आड अपप्रचार करीत आम आदमीन किल्लो लडयलो, काँग्रेस पक्षाची मजत मेळिल्ली जाल्यार घडये ह्या वेळारूय भाजपाक दिल्लींत कितेंय हाताक लागत हाची आस्त बाळगुपाचे कसलेंच कारण नाशिल्लें. काँग्रेस पक्षान उरफाटें फांशे उडयत भाजपाक नवी उर्बा दाखयली आनी आयज भाजपाच आपा कडल्यान दिल्लीची गादी झोमून घेतली अशें दिसपा इतली परिस्थिती निर्माण जाल्या. अशें कितेंय जालेंच जाल्यार वेंचणुके उपरांत आप आनी काँग्रेस हांचे मदीं सद्या आशिल्लो दुरावो दुपेटीन वाडूंक शकतलो. काँग्रेसी कडेन तृणमूल, समाजवादी आनी उबाठाची शिवसेना ह्या तिनूय पक्षांनी दिल्लींत फारकत घेतिल्ल्यान काँग्रेसीक ताचो फटको बसूंक शकता हें न्हयकारूंक येवचें ना.
दिल्लीतल्या आप सरकाराच्या सोरो घोटाळ्या वेल्यान भाजपाचो हल्लाबोल सुरू आसा आनी ह्या घोटाळ्याक लागून दोन हजारां परस चड कोटींच्या महसुलाचेर उदक सोडचें पडटलें असो आरोप आप सरकाराचेर जाता. आप सरकाराचें नवें अबकारी धोरण आनी मुख्यमंत्र्याचें निवासस्थान म्हूण उबो केल्लो 70-80 कोटींचो शिशमहल ह्यो दोन गजाली येता ते वेंचणुकेंत अरविंद केजरीवाल हांच्या मार्गा वेली मोटी आडखळ थारतली हें निश्चितूच आसा. अबकारी धोरणाची अंमलबजावणी करतना आप सरकारान नायब राज्यपालांची मंजुरी घेतली ना आनी वट्ट धोरणांत पारदर्शकतायेचो उणाव असो ठपको सरकाराचेर दवरला. दिल्लीतले सान्नीन सगल्याच मतदारांच्या हातांत फुकट रेवड्यांच्या रुपान कितेंय ना कितें तरी दान उडयिल्ल्यान ताचो फायदो घडये आम आदमीक मेळूंक शकता अशें दिसत आसलें तरी काँग्रेस पक्षाची हाजेरी तांकां मारक थारूंक शकता. आम आदमी खातीर काँग्रेस पक्षाच्या रुपांत खरो धोको आसा हातूंत दुबाव ना. दिल्लींत काँग्रेस पक्षाक ना म्हणलें तरी बरो जनाधर आसा. तातूंत भर म्हणून लाडक्या भयणीं खातीर अडेज हजार रुपया दिवपाची घोशणा करून काँग्रेसीन आम आदमीचेर चेपण हाडलां. लोकांच्या विस्वासार्हतेचे बाबतींत काँग्रेस आनी आप भाजपाचे खूबशे फाटीं आशिल्ल्यान भाजप आपल्या संकल्पनाम्यांत नेमक्यो कसल्यो घोशणा करतलो हाचे कडेन मतदारांचें लक्ष लागून आसा. काँग्रेस आनी आम आदमी पक्षूय भाजपा जारी करतल्या संकल्पनाम्या कडेन नदर दवरून आसा.
केजरीवाल हांच्या पक्षाची सत्ता दिल्लींत फाटलीं धा वर्सां आसतनाय जें केलें ना तें सगलें फुडल्या पांच वर्सांत करपाचो गमजो करप म्हणल्यार मदारांची शुद्ध फटवणूक आसा, हाचेर भारतीय जनता पार्टीचो सद्या भर दिसता. दिल्ली धा वर्सां उपरांतूय विकासाचें मॉडेल कित्याक जावंक शकली ना हो भाजप आनी काँग्रेसीचोय प्रस्न आसा. फुकट दितात त्यो वेगळ्योवेगळ्यो सरकारी सेवा, रेवडी संस्कृती हाचे बगर हेर कसलोच विचार न करपी आम आदमी पक्षाक ह्या वेळार लाडक्या भयणीची याद जाली. मध्य प्रदेश आनी महाराष्ट्रा उपरांत दिल्लीतूय लाडक्यो भयणीच आपलें सरकार थारायतल्यो काय कितें असोय एक प्रस्न विचारतात. पूण प्रस्थापितां आड दिसून येवपी ल्हार, काँग्रेस पक्षाची उपस्थिती भाजपाक अनुकूल संकेत दीत आसात. भाजप आनी काँग्रेसी कडेन आयज मुख्यमंत्रीपदा खातीर चेरो ना ही वस्तुस्थिती आसली तरी अरविंद केजरीवालचो चेरो दिल्लीकार चौथे फावटी स्विकारतले काय कितें हो दुबाव आसा. काँग्रेसीचे उपस्थितीक लागून खंयच्याय एका पक्षाक स्पश्ट भोवमत मेळचें ना अशेंय कांय जाणकार सांगतात, आनी तशें जायत जाल्यार आम आदमी आनी काँग्रेसीक परतून एकठांय येवन सरकार घडोवपाची संद मेळुये.
प्रधानमंत्री नरेंद्र मोदी हांणी दिल्लींत लायिल्लो प्रचार सभांचो धडाको कितें रंग हाडटलो हें सांगूंक येना आसलें तरी दीर्घ काळा उपरांत दिल्लीची गादी जिखपाचो भाजपाचो हावेस दिसून येता. दिल्ली आनी उपरांत बिहार अशें भाजपा खातीर दोन कडेन पेपर आसात. दिल्लीचे परिक्षेंत बरे गूण मेळोवन बिहारच्या पेपराची परिक्षा दिवप भारतीय जनता पक्षाक आवडटलें हें आनीक सांगपाची गरज ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
