भांगरभूंय | प्रतिनिधी
मुंबय, खबरां संस्था: मराठी नाट्यसंगीत मळार विशेश छाप सोडपी गायक, अभिनेते अरविंद पिळगांवकार (८७) संवसाराक अंतरलो. तांचे कुडीचेर मुंबयचे चंदनवाडी मसंडभूंयेंत निमणे संस्कार जाले.
पिळगांवकार हांणी विल्सन महाविद्यालयांतल्यान ‘बी.ए.’ अभ्यासक्रम पुराय केले उपरांत सुरवातेक मुंबय उच्च न्यायालयांत ‘लिपिक’ म्हणून नोकरी केली. या दरम्यान राष्ट्रीय नाट्य विद्यालयांतली (नॅशनल स्कूल ऑफ ड्रामा) मीना पेठे निर्मित ‘संगीत वासवदत्ता’ ह्या नाटकांत उदयन ही भुमिका साकारपाची तांका संद मेळ्ळी. उपरांत खर्या अर्थान संगीत मळार काम करपाक तांणी सुरवात केली. उपरांत मुंबय उच्च न्यायालयांत नोकरेचो राजीनामो दिवन तांणी पुरायवेळ गायन आन अभिनयाकडेन वळपाचो निर्णय घेतलो. पिळगांवकार हांणी पंडित के. डी. जावकर, पंडित जितेंद्र अभिषेकी आनी पंडित गोविंदराव अग्नी हांचे कडल्यान संगीताचे शिक्षण घेतलें. जाल्यार डॉ. दाजी भाटवडेकार आनी पुरुषोत्तम दारव्हेकर हांचे कडल्यान नाट्यशास्त्राचे धडे घेतले. तशेंच तांणी ‘साहित्य संघ’ आनी ‘विद्याधर गोखले प्रतिष्ठान’ हे संस्थेंत संगीत नाट्यप्रशिक्षक म्हणूनय काम केल्लें.
मुंबय मराठी साहित्य संघान सादर केल्ल्या ‘यशवंतराव होळकर’ ह्या ईतिहासीक नाटकाच्या वरवीं तांणी वेवसायीक रंगभूमीचेर पयलें पावल मारलें आनी उपरांत ‘ललितकलादर्श’, ‘कलावैभव’, ‘नाटयमंदार’, ‘रंगशारदा’ आनी ‘चंद्रलेखा’ अश्या जायत्या नाट्यसंस्थांच्या जायत्या नाटकांतल्यान विवीध भुमिका तांणी केल्यो. तशेंच आकाशवाणी दूरदर्शना खातीरूय काम केलें. ‘संगीत मानापमान’ ह्या नाटकांत विवीध प्रयोगां वरवीं तांणी ‘धैर्यधर’ ही भूमिका केली, वांगडा ‘लक्ष्मीधर’ हीय भुमिका केली. पिळगांवकार हांकां महाराष्ट्र राज्य शासनाच्या ‘अण्णासाहेब किर्लोस्कर जीवनगौरव पुरस्कारा’ सयत जायते पुरस्कार फावो जाल्यात.
मंद मंद ये समीर, उडून जा पाखरा, रुप सुंदर सखी, कधी भेटेन वनवासी, गणराज गजानन गौरीसुता, राजस माझी प्रिया वल्लभा, जोहार मायबाप जोहार… हीं तांचीं कांय पदां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
