भांगरभूंय | प्रतिनिधी
पणजी : राज्यांतल्या मेट्रो रेल्वे प्रकल्पा विशीं सध्या नियोजन पांवड्यार काम चालू आसा. फुडाराक गोंयांत मेट्रो रेल्वे येतली अशें मुख्यमंत्री डॉ प्रमोद सावंत हांणी सांगलें. सोमारा गोवा विद्यापीठ आनी उच्च शिक्षण खात्या वतीन आयोजीत ‘यंग लीडर कॉंक्लेव्ह’ हे कार्यावळींत ते उलयताले. ह्या वेळार आर्यन खेडेकार हांणी तांची मुलाखत घेतली. डाॅ. सावंत हांणी ह्या वेळार हजर आशिल्ल्या विद्यार्थ्यां वांगडा संवाद सादलो.
मेट्रो रेल्वे प्रकल्पा विशीं मुळाव्या टप्प्यांत काम चालू आसा. हे विशीं आमी प्रस्तावूय तयार करतात. तशेंच भारतीय रेल्वे आनी हेर केंद्रीय खात्यां वांगडा चर्चा चलता. फुडल्या कांय काळांत मेट्रो रेल्वे गोंयांत येतली. सध्या गोंयांत ५० ते ६० आयटी कंपन्यो काम करतात. गोंयांत सध्या तरी आयटी हब ना. अशें जरी आसलें तरी फुडाराक राज्यांत आयटी हब करपाचो आमचो विचार आसा, अशें मुख्यमंत्र्यान मुखार म्हणलें.
एका विद्यार्थ्याच्या प्रस्नाक जाप दितना मुख्यमंत्र्यांनी म्हणलें, राज्यांत नर्सिंगाचे चडशे विद्यार्थी बीएससी करून नोकरी करतात. हाका लागून एमएससी नर्सींग धारकांचो आंकडो उणो आसा. सध्या राज्याक एमएससी नर्सींग केल्ल्या लोकांची गरज आसा. बीएससी प्रमाण एमएससीक शिश्यवृत्ती ना. तरी विद्यार्थ्यांची मागणी आसल्यार मुख्यमंत्री अप्रेंटीशीप येवजणे खाला एमएससी नर्सिंगच्या विद्यार्थ्यांक अर्थीक मजत दिवपाचो विचार करतले.
सरकारान हालींच राज्यांत ४० सुवातांचेर फुकट वायफाय हॉट स्पॉट सुरू केलां. हाचो विद्यार्थ्यांनी वापर करचो. आदल्या काळार म्हायती मेळप हें सहज शक्य नाशिल्लें. आतां मोबायल वा इंटरनेटाचेर रोखडीच म्हायती मेळपाक शकता. मात जायते जाण इंटरनेटाचेर बर्यो गजाली घेवपाच्यो सोडून वायट गजालीच घेतात. मोबायल इंटरनेटाचो वापर स्वताचे उदरगती खातीर करून घेवपाचो काय ना हें आपापल्यान थारावचें, अशेंय तांणी म्हणलें.
एकाच कॉम्प्लेक्सांत तीन महाविद्यालयां
गोंय विद्यापीठांत २ लाख चौरस मिटर सुवातेर कॉम्प्लेक्स बांदपाचो आमचो विचार आसा. ह्या कॉम्प्लेक्सांत फार्मसी, आर्किटेक्चर आनी संगीत महाविद्यालय बांदतले. फार्मसी महाविद्यालयाचे नवे इमारतीचो बुन्यादी फातर फुडल्या स म्हयन्यांनी बसयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
