भांगरभूंय | प्रतिनिधी
पणजी: देहराडून, उत्तराखंडच्या राष्ट्रीय भारतीय लश्कर महाविद्यालयांत यत्ता ८ वीच्या वर्ग प्रवेशा खातीर खंयचेय मान्यताप्राप्त शाळेंत यत्ता ७ वेच्या वर्गांत शिकपी वा यत्ता ७ वी पास जाल्ले चले आनी चली विद्यार्थ्यां कडल्यान अर्ज मागयल्यात. प्रवेश परीक्षा संबंदीत राज्यांतल्या निवडक केंद्रांचेर आयतार १ जून २०२५ दिसा जातली.
प्रवेश परीक्षे खातीर उमेदवारांची पिराय साडे अकरा वर्सां ते तेरा वर्सां मजगतीं आसपाक जाय, म्हणजे उमेदवारांचो जल्म २ जानेवारी २०१३ पयलीं आनी १ जुलय २०१४ उपरांत जाल्लो आसपाक जायना.
गणीत, सर्वसामान्य ज्ञान आनी इंग्लीश विशयाची लेखी परिक्षा जातली. तोंडी परीक्षेची तारीख आनी वेळ उपरांत कळयतले. परीक्षेचो निकाल राष्ट्रीय भारतीय लश्कर महाविद्यालयाचे www.rimc.gov.in. हे वेबसायटीचेर अपलोड करतले.
सध्या वर्सुकीं शुल्क सामान्य वर्गां खातीर १४८६५०/- रूपया आनी एससी/एसटी उमेदवारां खातीर १३१८५०/- रूपया आसा जी वाडपाक शकता. प्रवेशा वेळार ५०,०००/- रूपया सुरक्षा ठेव भरपाक जाय जी विद्यार्थी महाविद्यालयांतल्यान पदवीधर जाले उपरांत परत करतले.
विहीत नमुन्यांतले प्रतीरूप अर्ज दोन पासपोर्ट आकाराचे फोटो, उमेदवारांचो राबीतो दाखलो, जल्म दाखलो, एससी/एसटी दाखलो, फोटो सयत जल्म तारीख आनी शिकपी वर्गाची प्रमाणीत म्हायती दिवपी शाळा मुख्याद्यापकांचो दाखलो, आधार कार्डाची फोटोकॉपी (दोनीय वटेनच्यान) दाखल्या सयत संबंदीत राज्य सरकारा कडेन ता. ३१ मार्च मेरेन अर्ज पावपाक जाय. अर्ज राज्य सरकाराक धाडपाक जाय, न्हय राष्ट्रीय भारतीय लश्कर महाविद्यालयाक, हांची नोंद घेवची.
म्हायती पुस्तिका तशेंच विहीत नमुन्यांतले अर्ज आनी पोरण्या प्रस्नपत्रीकांची पुस्तीका सर्वसामान्य वर्गांतल्या उमेदवारांनी ६००/- रूपया आनी एससी/एसटी उमेदवारांनी खातीर ५५५/- रूपया राष्ट्रीय भारतीय लश्कर महाविद्यालयाचे www.rimc.gov.in. हे वेबसायटीचेर ऑनलायन भरून मेळोवची. तशेंच द कमांडंट, राष्ट्रीय भारतीय लश्कर महाविद्यालय, देहराडून, एचडीएफसी बँक, बल्लुपूर चौक, देहराडून (बँक कोड-१३९९) उत्तराखंड- २४८००३ ह्या नाम्याचेर वयल्या रक्कमेचो डिमांड ड्राफ्ट काडून मेळोवं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
