भांगरभूंय | प्रतिनिधी
नवी दिल्ली, खबरां संस्था ः देशांत क्रेडीट कार्डाचो वापर बरोच वाडत आसा. जायते फावटीं लोक क्रेडीट कार्डान बिलां फारीक करतात, हाका लागून तांचो क्रेडीट स्कोअर वाडटलो अशें तांकां दिसता. क्रेडिट स्कोअर 300 ते 900 मेरेन आसता. 650 सकयल आशिल्लो स्कोअर वायट मानतात. वेळार बिल फारीक केल्यार लेगीत गिरायकाचो क्रेडीट स्कोअर सुदारूंक शकना हाची कांय कारणां दिल्यात.
१. मर्यादे परस 30% परस चड खर्च करप टाळचें
क्रेडीट कार्डांचो चड वापर क्रेडीट स्कोअर स्थिर वा उणो जावपाक कारण आसूं येता. कार्ड मर्यादेच्या 10-15% वापरप बरें. पूण 30% परस चड खर्च केल्यार क्रेडीट स्कोअर उणो वा इबाडूंक शकता. म्हणल्यार तुमच्या क्रेडीट कार्डाची मर्यादा 1.5 लाख रुपया आसल्यार म्हयन्याक 45 हजार रुपया परस चड खर्च करचो न्हय.
२. क्रेडीट स्कोअर नेमान तपासात
क्रेडिट रिपोर्ट शंबर टक्के अचूक नासता. ह्यो चुको तुमच्या अर्थीक वागणुकेचें चुकीचें वर्णन करूंक शकतात. अशें परिस्थितींत तुमच्या क्रेडीट कार्डाचो अहवाल नेमान तपासात.
३. सुरक्षीत आनी असुरक्षित रीण तुमच्या रिणाच्या वळेरेंत दवरात
समतोल क्रेडिट प्रोफायलांत सुरक्षीत आनी असुरक्षित रिणांचो आस्पाव आसपाक जाय. वैयक्तीक रीण वा क्रेडीट कार्ड अशा एका प्रकारच्या रिणाचेर आदारून रावप क्रेडिट स्कोअरांत आडमेळीं हाडटा. अशे परिस्थितींत भांगराच्या रिणासारक्या सुरक्षीत रीणाचो आस्पाव रिणांत करचो.
४. एकाच वेळार जायत्या रिणां खातीर अर्ज करचो न्हय
एकाच वेळार एका परस चड क्रेडीट कार्ड वा रिणां खातीर अर्ज करचो न्हय. हाका लागून क्रेडीट रिपोर्टाचेर चवकशी जाता. हाका लागून तुमचें क्रेडीट स्कोअर उणो जाता.
५. नकारात्मक रेकॉर्डाचो परिणाम 7 वर्सां मेरेन उरता
सध्या तुमी सगळे पेमेंट वेळार करतात तरी. पूण पोरणो रेकॉर्ड बरो ना जाल्यार ताचो परिणाम तुमच्या क्रेडीट स्कोअराचेर 7 वर्सां मेरेन दिसूं येता. तशेंच जर पोरणें क्रेडीट अकावंट आसात जाल्यार तें बंद करुं नाकात. हाका लागून तुमचो क्रेडीट स्कोअर उणो जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
