भांगरभूंय | प्रतिनिधी
पणजी : कोंकणी भाशा मंडळ आनी युवा जैतीवंत दिवचल आयोजीत 26 व्या गोवा युवा महोत्सवा खातीरची कार्यशाळा 14 जानेवारी दिसा रातीं 8 वरांचेर जातली. ती ऑनलायन माध्यमांतल्यान जातली. सगळ्या सर्तक पंगडांच्या आनी शिक्षणीक संस्थांच्या उण्यांत उण्या दोन प्रतिनिधींक ती सक्तीची आसा. पंगडांच्या आनी शिक्षणीक संस्थांच्या मुखेल्यांनी कार्यशाळेंत वांटो घेवंक जाय. हाजीर रावंक नाशिल्ल्या पंगडांक आनी शिक्षणीक संस्थांक महोत्सवांत कसलीच कागाळ करपाचो हक्क आसचो ना.
महोत्सवांत कमीत कमी 5 सर्तींनी वांटो घेवप बंधनकारक आसा. महोत्सवांत आयोजीत जावपी नव्या सर्ती विशीं तशेंच कांय सर्तींतल्या नेमांनी केल्ल्या बदला विशीं कार्यशाळेंत सविस्तर माहिती दितले. कार्यशाळेंत वांटो घेवंक गुगल लिंक – https://meet.google.com/bnm-ugqr-mpz
मजगतीं, युवा महोत्सवा खातीर नांव-नोंदणी करपाची तारीख वाडयल्या. 16 जानेवारी दिसा रातीं 12 मेरेन नांव-नोंदणी करूं येता. 17 जानेवारी दिसा रातीं 12 मेरेन नांव-नोंदणी केल्ल्या सर्तकांचे 5 गूण वजा जातले. 18 जानेवारीक रातीं 12 मेरेन नांव-नोंदणी केल्ल्या सर्तकांचे 10 गूण वजा जातले. ते उपरांत, नांव- नोंदणी स्विकारचे नात. ब्रोशर (कार्यावळ पत्रिका) मंडळाच्या www.konkanibhashamandal.com ह्या संकेतथळाचेर आसा. 18 जानेवारी दिसा मेरेन रंगीत खोमीस हे सर्ती खातीरचे डिजिटल आर्टवर्क [email protected] ईमेलाचेर पावंक जाय. सर्तींत वांटो घेवंक प्रतिज्ञापत्र दिवपाची सक्ती आसा. ना जाल्यार प्रवेशिका मान्य जावची ना. प्रतिज्ञापत्र मंडळाच्या संकेतथळाचेर उपलब्ध आसा.
युवा महोत्सव 25 आनी 26 जानेवारी दिसांनी सर्वण दिवचलच्या नारायण झांटये वाणिज्य म्हाविद्यालयांत जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
