भांगरभूंय | प्रतिनिधी
बिजापूर : छत्तीसगडच्या बिजापूर जिल्ह्यांत सुरक्षा दळा वांगडा जाल्ले फारपेटींत दोन बायलां सयत पांच नक्षलींक मरण आयलें. इंद्रावती अभयारण्याच्या वाठारांत सुरक्षा जवानांचो पंगड नक्षलविरोधी मोहिमेचेर आसतना फारपेट सुरू जालो, अशें बस्तरचे पुलीस महानिरीक्षक सुंदरराज पी हांणी सांगलें. पंगडा मदीं राज्य पुलिसांचो जिल्लो राखीव दळ (डीआरजी), विशेश कृतीदळ (एसटीएफ) आनी जिल्लो दळ हांच्या जवानांचो वांटो आशिल्लो.
घडणुके सुवातेर गणभेसांत तीन नक्षलवाद्यांच्यो कुडी सांपडल्यो. तशेंच स्वयंचलित बंदुकां सयत शस्त्रां आनी स्फोटूय ताब्यांत घेतले. फारपेटी उपरांत सोद मोहीम हातांत घेतली, अशें पुलीस अधिकार्यांनी सांगलें.
नक्षल्यांनी केल्ल्या आयईडी स्फोटांत दोन पुलीस जखमी जाले. ही घडणूक बीजापुरच्या जैनूर गांवांतल्या रानांत घडली. दोनूय पुलिसांक हॉस्पिटलांत दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
