भांगरभूंय | प्रतिनिधी
शौचालय चडांत चड बरें करपा खातीर पुराय संवसारांत जितले बदल जाले, तातूंत फ्लशाचोय आस्पाव आसा. फ्लशाचो वापर उदक सोडपा खातीर करतात. जर तुमी आधुनीक शौचालयाच्या फ्लशाचेर नदर मारली जाल्यार ताचेर तुमकां दोन बटन दिसतले. हाका ड्युएल फ्लश टॉयलेट अशें म्हणटात. पूण प्रस्न उप्रासता ताका दोन बटन कित्याक?
सगळ्यांत पयलीं तो कसो आसता तें समजून घेवया. फ्लशाच्या वयल्या भागांत दोन बटन आसता. तातूंतलो एक ल्हान आनी दुसरो व्हडलो आसता. हे दोनूय बटन फ्लशाच्या वॉल्वाक जुडिल्ले आसतात. पूण लोक शौचालयाचो वापर केले उपरांत उदक सोडचे खातीर व्हडलें बटन दामतात. कारण खूबश्या लोकांक ताच्या ल्हान बटनाचो उपेग खबर आसना.
आतां समजून घेवया, हे दोन बटन कित्या खातीर दिल्ले आसतात. तंत्राक नदरेन फ्लशाचो व्हडलो बटन संडास व्हांवून वचपा खातीर लायिल्लो आसता. कारण तो एके खेपे सुमार 6 ते 9 लिटर उदक सोडटा. जाल्यार ल्हान बटन पातळ पदार्थ देखीक मूत व्हांवून वचचें हे खातीर लायिल्लो आसता. ल्हान बटन सुमार 3 ते 4 लिटर उदक सोडटा.
फ्लशाक दोन बटन लावपाची सुरवात हे खातीर जाली कारण उदकाची बचत जावची. ते लावपा फाटल्यान उद्देश आशिल्लो, मनीस आपले गरजे प्रमाण दोन बटनांतल्या एका बटनाचो वापर करतलो. म्हणल्यार मुतले उपरांत ल्हान बटनाचो वापर करतलो. पूण पुराय तरेन हो उद्देश सफळ जावंक ना. कारण खूबश्या लोकांक ताची म्हायती नाशिल्ल्यान ते व्हडल्या बटनाचो वापर करीत रावले.
शौचालयांत ड्युएल फ्लश लावपाची कल्पना खरें म्हणल्यार अमेरिकेचे इंडस्ट्रीयल डिझायनर व्हिक्टर पेपानेकाची आशिल्ली. 1976 त उजवाडाक आयिल्लें ताचें पुस्तक ‘डिजायन फॉर द रियल वर्ल्ड’ हातूंत ताचो उल्लेख केला. तरी लेगीत संवसारांत पयले खेपे ड्युएल फ्लश ऑस्ट्रेलियेंत 1980 त तयार केलो. ते उपरांत पुराय संवसारांत ताचो वापर जावपाक सुरवात जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
