देव बोडगेश्वराचे जात्रेक दबाज्यान सुरवात

भांगरभूंय | प्रतिनिधी

19 जानेवारी मेरेन विवीध कार्यावळी

भांगरभूंय । प्रतिनिधी

म्हापशें: म्हापशेंचें जागृत दैवत श्री देव बोडगेश्वर देवस्थानाचे 90 वे जात्रेक आयतारा हजारांनी भाविकांचे हाजिरेंत सुरवात जाली. ही जात्रा आयतारा 19 जानेवारी मेरेन चलतली.

जात्रेचे पुजेचें यजमानपण देवस्थान समितीचे अध्यक्ष आनंद भाईडकार हांणी घरकान्नी सयत केलें. दनपारां 12 वरांचेर देवाच्या पांया कडेन नाल्ल दवरून आनी पुरयतान गाराणे घातले उपरांत हे जात्रेक सुरवात जाली. ह्या वेळार म्हापशें वाठारांतलीं विवीध देवस्थानां, विवीध संस्था, पुलीस, उजो पालोवपी दळ आनी पालिके वतीन देवाच्या पांया कडेन फळांचो प्रसाद ओंपलो. शिवोलीची आमदार डिलायला लोबो, नगराध्यक्ष डॉ. नूतन बिचोलकार, उपनगराध्यक्ष सुशांत हरमलकार, पुलीस उपअधिक्षक संदेश चोडणकार, निरिक्षक निखील पालेकार, सूरज गांवस, विजय राणे, मार्लन डिसोझा, हांचे सयत विवीध सरकारी अधिकारी, लोकप्रतिनिधींनी दनपार मेरेन देवाचें दर्शन घेतलें. काल वर्धापन दिसा मुख्यमंत्री डॉ. प्रमोद सावंत, केंद्रीय मंत्री श्रीपाद नायक, राज्यसभा खासदार सदानंद शेट तानावडे, आदले केंद्रीय मंत्री अ‍ॅड. रमाकांत खलप, आदले आमदार दामू नायक, दयानंद सोपटे हांणी देवाचें दर्शन घेतलें. शेनवारा 11 जानेवारीक श्रीदेव बोडगेश्वराचे मुर्ती प्रतिश्ठापनेचो 35 वो वर्धापन दीस मनयलो. समितीचे मुख्यात्यार राजेंद्र पेडणेंकार आनी घरकान्नी सयत यजमानपण केलें. ह्या दिसा वेशभुशा सर्त जाली.

आयतारा दनपारां पुरयत जाश्वेत आपटे आनी आंचल आपटे हांचे वतीन मुख्य पुजा जाले उपरांत भाविकांनी देवदर्शन घेवपाक सुरवात केली. सांजेच्या 4 वरांचेर श्री सत्पुरुश ब्राह्मण दिंडी पंगड, कामुर्ली वतीन दिंडी, 7 वरांचेर स्वरसंपदा ही संपदा माने (मुंबय) आनी ओंकार च्यारी (गोंय) हांणी भावभक्ती गितांची कार्यवळ सादर केली. रातच्या 12 वरांचेर प्रवीण रघुनाथ कळंगूटकार दशावताली मंडळा वतीन शिवशक्ती महिमा हें नाटक सादर जालें.

सोमारा सकाळीं 10 वरांचेर श्री सत्यनारायण महापुजा, सांजेच्या 5.30 वरांचेर बोरयेच्या नवदुर्गा भजन मंडळाचें भजन, 7.30 वरांचेर स्वर अक्षय ही संगिताची कार्यावळ अक्षय नायक आनी सांगाती सादर करतले.

मंगळारा 14 जानेवारीक सकाळीं 10 वरांचेर पिकअप ड्रायव्हर असोसिएशन, म्हापशें वतीन श्री सत्यनारायण महापुजा, सांजेच्या 5 वरांचेर सुशिला सांस्कृतीक संस्था, शिरगांव निर्मीत आनी आराध्या प्रस्तूत वंदन श्री बोडगेश्वर देवा ही सुगम संगिताची कार्यावळ गायक कलाकार अनिस्का चांगदेव नायक आनी सावळो चोडणकार सादर करतले. रातच्या 8 वरांचेर स्वर भगिनी प्रस्तूत ममता प्रभू, तेजल गावडे आनी वैष्णवी प्रभू हांची संगिताची कार्यावळ जातली.

बुधवारा 15 जानेवारीक सकाळीं 10 वरांचेर नुस्तें विक्रेते, म्हापशें वतीन श्री सत्यनारायण महापुजा, सांजेच्या 5 वरांचेर रक्षंदा आमोणकार प्रस्तूत आराधना  ही भरतनाट्यम आनी उपशास्त्रीय नाचाची कार्यावळ जातली. रातच्या 8 वरांचेर सूर निरागस ही कार्यावळ नवाब शेख, गौतमी हेदे बांबोळकार, नम्रता पराडकार हे कलाकार सादर करतले.

बिरेस्तारा 16 जानेवारीक सकाळीं 10 वरांचेर रिक्षा ड्रायव्हर असोसिएशन (कदंब स्टॅण्ड) म्हापशें वतीन श्री सत्यनारायण महापुजा, सांजेच्या 5 वरांचेर सांज सुरांची ही मराटी गीत माळ कार्यावळ नेहा करसुलकार, तेजस वेर्णेंकार आनी गायत्री पाटील हे कलाकार सादर करतले. 7.30 वरांचेर रंग सुरांचे ही कार्यावळ सन्मिता धापटे शिंदे आनी सांगाती कलाकार सादर करतले.

शुक्रारा 17 जानेवारीक सकाळीं 10 वरांचेर म्हापशें नगरपालिके वतीन श्री सत्यनारायण महापुजा, सांजेच्या 5 वरांचेर अभंगवाणी ही कार्यावल दिव्या च्यारी आनी सांगाती कलाकार सादर करतले. रातच्या 8 वरांचेर स्वर सार्थक ही संदेश खेडेकार आनी सांगाती कलाकारां वतीन शास्त्रीय आनी उपशास्त्रीय गायनाची कार्यावळ जातली.

शेनवारा 18 जानेवारीक सकाळीं 10 वरांचेर म्हापशें भाजी विक्रेत्यां वतीन श्री सत्यनारायण महापुजा, सांजेच्या 5 वरांचेर नृत्याविश्कार नृत्यांगण अकादमी गोवा वतीन पांडुरंगा विठ्ठला ही कार्यावळ जातली. 7.30 वरांचेर केतन साळगांवकार प्रस्तूत फुलले रे क्षण माझे ही कार्यावळ रवीन्द्र अहिरे (मुंबय), विभा आळगुंडगी आनी समृद्ध चोडणकार हे कलाकार सादर करतले. आयतारा 19 जानेवारीक सांजेच्या 5.30 वरांचेर गोवा कला आनी संस्कृती संचालनालय पुरस्कृत सांस्कृतीक कार्यावळ जातली आनी उपरांत जात्रेचो समारोप जातलो. मजगतीं जात्रेच्या आठूय दिसा दनपारां 1 वराचेर महाप्रसाद आसतलो.