भांगरभूंय | प्रतिनिधी
फोंडें : धारबांदोडेच्या एका हायस्कुलाच्या शिपायान मैदानार खेळपी भुरग्यांक बडयले. हातूंत चार भुरगे जखमी जाले. तांतल्या दोगां भुरग्यांक उपचारा खातीर हॉस्पिटलांत दाखल केले उपरांत तांचेर उपचार करून तांकां घराय धाडले. हे विशीं पुलिसांक म्हायती दिले उपरांत त्या शिपायाक पुलिसांनी रोखडोच ताब्यांत घेतलो.
हे विशीं मेळिल्ले म्हायती प्रमाण, धारबांदोड्यां एका हायस्कुलांत काम करपी एका शिपायाक शाळेच्या वेवस्थापनान आयतारा शाळेंत येवन अदीं मदीं त्या वाठाराची पळोवणी आनी सांबाळपाचे निर्देश दिल्ले. हो शिपाय मूळ धारबांदोडेंचो. सध्या तो फोंड्यां रावता. आयज तो आदेशा प्रमाण शाळेच्या वाठाराची पळोवणी करपाक आयलो. तेन्ना शाळेच्या मैदानाचेर ७-८ चले खेळटना ताका दिसले. तांकां पळोवन शिपायाक तिडक मारली. सुरवातेक तांणी भुरग्यांचेर फातर मारपाक सुरवात केली. तेन्ना एका भुरग्याच्या हाताचेर फातर बसून ताका दुखापत जाली. उपरांत शिपाय भुरग्यांच्या फाटल्यान धांवलो. तांणी एका भुरग्याक धरून ताच्या पोल्याचेर चप्पल मारली. आनीक दोगांक धरून तांकांय बडयले. भुरगीं पळून गेले उपरांत ह्या शिपायान थंय लागींच दवरिल्ल्यो तांच्यो सायकलीय मोडून घाल्यो.
मजगतीं, भुरग्यांनी घरा वचून हो सगळो प्रकार आपल्या पालकांक सांगलो. हातुंतल्या चार भुरग्याक बडयल्ले. दोगा जाणांक चडूच दुखापत जाल्ली. त्या दोगांयकूय हॉस्पिटलांत व्हरून तांचेर उपचार केले उपरांत तांकां घरा धाडले. सध्या ह्या भुरग्यांचे पालक पुलीस स्टेशनाचेर हाजीर आसात. हे विशीं ते शिपाया आड कागाळ दाखल करतात. उपरांत पुलीस त्या शिपायाचेर आरोप निश्चीत करून ते फाटभूंयेर गुन्यांव दाखल करतले,अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
