भांगरभूंय | प्रतिनिधी
भाजपाचे वरिश्ठ फुडारी व्यस्त आशिल्ल्यान फेरबदल धुकल्लो मुखार
भांगरभूंय । प्रतिनिधी
पणजीः दिल्ली विधानसभा वेंचणुकेच्या निकाला उपरांत राज्य मंत्रीमंडळांत फेरबदल जावपाक शकता. सध्या भाजपाचे केंद्रांतले वरिश्ठ फुडारी दिल्ली विधानसभा वेंचणुकेंत व्यस्त आसात. ताका लागून गोंय मंत्रीमंडळ फेरबदला संबंदांत तांणी विचार करूंक ना. हे वेंचणुकेचो निकाल 8 फेब्रुवारीक जाहीर जाले उपरांत तांचे कडल्यान मंत्रीमंडळ फेरबदला संबंदांत विचार सुरू करतले, अशी म्हायती प्रदेश भाजपाच्या ज्येश्ठ फुडाऱ्यान ‘भांगरभूंय’ कडेन उलयतना दिली.
फाटले विधानसबा वेंचणुकेच्या निकाला उपरांत काँग्रेसीच्या आठ आमदारांनी भाजपांत प्रवेश करीत सावन राज्य मंत्रीमंडळांतल्या फेरबदला संबंदांत एकसारक्यो चर्चा रंगतात. काँग्रेसींतल्यान जे आठ आमदार भाजपांत गेले, तांचे मदल्या उण्यांत उण्या तीन आमदारांक मंत्रीपद मेळपाची चर्चा चलताली. पूण भाजपान लोकसभा वेंचणुके आदीं दक्षीण गोंयांतलीं गणितां लक्षांत घेवन फकत आलेक्स सिक्वेरा हांकांच मंत्रीपद दिलें. ते उपरांत मुख्यमंत्री डॉ. प्रमोद सावंत हांचे सयत राज्यसभा खासदार तशेंच भाजप प्रदेशाध्यक्ष सदानंद शेट तानावडे हांणीय कांय दीस सेगीत मंत्रीमंडळांत फेरबदल जावपाचे संकेत दिल्ले. पूण कांय दिसां आदीं मंत्रीमंडळ फेरबदलाच्यो चर्चा निरर्थक आशिल्ल्याचें सांगून तानावडे हांणी तशेंच मुख्यमंत्री डॉ. प्रमोद सावंत हांणी ह्या विशयाक पूर्णविराम लावपाचो यत्न केलो. पूण आतां दिल्लींतले विधानसभा वेंचणुकेक लागून गोंय मंत्रीमंडळांतलो फेरबदल फुडें धुकल्ला, अशें ह्या फुडाऱ्यान सांगलें.
केंद्रांत सरकार आशिल्ल्यान भाजपाक हे खेपे खंयचेय परिस्थितींत दिल्लीची सत्ता मेळोवपाची आसा. ते खातीर केंद्रांतले सगळेच फुडारी कामाक लागल्यात. सध्याचे स्थितींत फकत दिल्ली विधानसभा जिखपाचो विचार तांचे कडल्यान चल्ला. ते खातीर गोंयांतल्या बदला विशीं निश्चीत विचार सुरू जातलो, अशें तांणी सांगलें. दिल्लीचो निकाल लागताच तांचे कडल्यान गोंयांतल्या बदला विशीं निश्चीत विचार सुरू जातलो, अशें तांणी सांगलें. सध्याचे स्थितींत फकत मंत्रीमंडळांत फेरबदल जावपाक शकता. मुख्यमंत्री डॉ. प्रमोद सावंत हांची कामगिरी दर्जेदार आशिल्ल्यान पक्षश्रेश्ठी कडल्यान नेतृत्व बदला विशीं विचार जावपाची शक्यताय उणी आशिल्ल्याचेंय ह्या फुडाऱ्यान सांगलें.
कांय मंत्र्यांची कामगिरी सुमार दर्ज्याची
गोंय मंत्रीमंडळांतल्या दोन ती तीन मंत्र्यांची कामगिरी सामकीच सुमार दर्ज्याची आसा. फुडारांत येवपी वेंचणुकांक फुडो करतना भाजपाक मंत्रीमंडळांतलीं अशीं मुखामळां बदलचींच पडटलीं. तशी मागणी प्रदेश भाजपाच्या ज्येश्ठ फुडाऱ्यांनी पक्षश्रेश्ठीं कडेन केल्या. ताका लागून पक्षश्रेश्ठीनी मंत्रीमंडळ फेरबदलाचो विचार केला, अशेंय ह्या फुडाऱ्यान सांगलें.
प्रदेशाध्यक्षपदा खातीर फुडाऱ्यांचें लॉबींग सुरू
मंडळ, जिल्हो अध्यक्षांचे नेमणुके उपरांत भाजप कार्यकर्त्यांचें लक्ष आतां नवो अध्यक्ष कोण जातलो, हाचेर लागलां. प्रदेशाध्यक्षपदाचे सर्तींत आशिल्ल्या कांय फुडाऱ्यांनी आपापले पद्दतीन वॉबींग सुरू केलां. पूण येता त्यो वेंचणुको दोळ्या मुखार दवरून भाजपा कडल्यान सध्याचे प्रदेशाध्यक्ष सदानंद शेट तानावडे हांकांच ह्या पदाचेर कायम दवरपाची शक्यताय आशिल्ल्याचें भाजपाच्या त्या फुडाऱ्यान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
