भांगरभूंय | प्रतिनिधी
शेतकी संचालनालय: दर हॅक्टरा फाटल्यान 15 हजार अनुदानाक लागून शक्य
भांगरभूंय । समीप नार्वेंकार
पणजीः फाटल्या 5 वर्सांत 97 शेतकारांनी आपल्या शेतांनी परतून देंवून पडींग जमीन लागवडी खाला हाडल्या. हे खातीर सराकारा कडल्यान ह्या शेतकारांक 20 लाख रुपयांचें अनुदान दिलां. सरकाराच्या ह्या यत्नाक लागून फाटल्या 5 वर्सांत गोंयांतली सुमार 130 हॅक्टर पडींग जमनीर पिकावळ पिकल्या, अशी म्हायती शेतकी संचालनालयान दिली.
शेतकी संचालनालयांतल्या वरिश्ठ अधिकाऱ्यान दिल्ले म्हायती प्रमाण पडींग जमीन लागवडी खाला हाडपा खातीर आनी गोंयकारांक परतून शेतांनी देंवपाक उर्बा दिवपा खातीर शेतकी खात्यान विविध पावलां उबारल्यांत. हाचोच एक भाग म्हूण शेतकी संचालनालयान पडींग शेतां ओंपपा खातीर एक खेपेचो आदार (वन टायम एसिटन्स) ही येवजण चालीक लायल्या. शेतांतली नडणी काडून ताची मशागत करून ती पिकावळीक योग्य करपा खातीर दर शेतकाराक दर हॅक्टरा फाटल्यान 15 हजार रुपयांचें अनुदान दिता. हाका लागून खूबशे शेतकार परतून शेतांनी देंवून शेतां ओंपपाक लागल्यात. हातूंत माक्नाचो आनी मानायाचो वापर करून नडणी काडून, जोत लावपा खातीर हें अनुदान मेळटा, अशी म्हायती वरिश्ठ अधिकाऱ्यान दिली.
हे येवजेणे खातीर फाटलीं पांच वर्सां गोंय सरकारान 36.5 लाख रुपयांची अर्थीक तजवीज केल्या. तातूंतले 20 लाख रुपयांचें अनुदान 97 शेतकारांक दिलां. शेतकारंनी हें अनुदान घेवन 129.28 हॅक्टर सुवात लागवडी खाला हाडल्या. नोव्हेंबर 2024 मेरेन 7 नवे शेतकार तयार जावन तांणी 3.71 हॅक्टर सुवात लागवडी खाला हाडल्या. अंदूं खातीर 5 लाख रुपयांचो निधी मंजूर जाला आनी आतां मेरेन सुमार 60 हजार रुपया मेरेन अनुदान दिलां.
2019- 20 त 13 शेतकार शेतांत देंविल्ले आनी तांणी 19.43 हॅक्टर सुवात लागवडी खाला हाडिल्ली. त्या वर्सा खातीर सरकारान 7.5 लाख रुपयांचो निधी मंजूर केल्लो आनी तातूंतले 2.88 लाख रुपयांचें अनुदान ह्या शेतकारांक दिले.
2020- 21 त 11 शेतकार परतून तयार जाले आनी तांणी 21.97 हॅक्टर शेत जमीन रोयली. त्या वर्सा खातीर सरकारान 5 लाख रुपयांचो निधी मंजूर केल्लो आनी तातूंतले 3.17 लाख रुपयांचें अनुदान ह्या शेतकारांक दिलें.
2021- 22 त शेतकारांचे संख्येंत व्हड मोठी वाड जावन हो आंकडो 25 मेरेन पावलो आनी तांणी 54 हॅक्टर शेत जमनीचेर पिकावळ काडली. ह्या वर्सा खातीर सरकारान 9 लाख रुपयांचो निधी मंजूर केल्लो आनी तातूंतले 7.97 लाख रुपयांचें अनुदान ह्या शेतकारांक दिलें.
2022- 23 त 16 नवे शेतकार तयार जाले आनी तांणी 16.32 हॅक्टर शेत जमीन पिकावळी खाला हाडली. ह्या वर्सा खातीर सरकारान 5 लाख रुपयांचो निधी मंजूर केल्लो आनी तातूंतले 3.71 लाख रुपयांचें अनुदान शेतकारांक दिलें. 2023- 24 त शेतकारांचे संख्येंत परतू वाड जावन 25 शेतकार परतून शेतांत देंवले आनी तांणी 13.85 हॅक्टर शेत जमीन पिकावळी खाला हाडली. ह्या वर्सा खातीर सरकारान 5 लाख रुपयांचो निधी मंजूर केल्लो आनी तातूंतले 1.88 लाख रुपयांचें अनुदान शेतकारांक दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
