भांगरभूंय | प्रतिनिधी
मडगांव: प्रुंडट मिडिया नॅटवर्का कडल्यान बेळगांव सयत गोंयच्या नेमनेच्या आस्थापनांक एकाच पाख्या खाला हाडून गिरायकांक खरेदीची संद उपलब्ध करून दिल्या. ह्या प्रदर्शनाक बरो प्रतिसाद मेळत आसा. गिरायकांक सवाय दरांत खरेदी करूंक मेळटा. गिरायकांनी ह्या एक्स्पोची तोखणाय लेगीत केल्या.
मडगांवच्या बीपीएस स्पोर्ट्स क्लबांत प्रुडंट मिडिया नॅटवर्का कडल्यान गोंय बेळगांव एक्स्पोचें आयोजन केलां. ह्या एक्स्पोंत बऱ्यो वस्तू सवाय मोलांत उपलब्ध आशिल्ल्यान गिरायकांक खरेदीची बरी संद उपलब्ध आसा आनी गिरायकांनी हे संदीचो फायदो घेतला. बिरेस्तारा ह्या एक्स्पोचें उक्तावण सभापती रमेश तवडकार, आमदार दिगंबर कामत, बीपीएसचे अध्यक्ष योगिराज कामत हांचे हाजिरेंत जायत सावन आतां मेरेन शेंकड्यांनी गिरायकांनी खरेदी खातीर गर्दी केल्ल्याचें दिसून आयलें.
परबेच्या दिसांन लागपी कपड्यांचे खरेदी सावन एक ग्राम भांगराच्या वस्ती खातीर बायलांची गर्दी दिसून येताली. सदच्यो तशेंच सिल्क साडयांनी विवीध साडयां सयत परंपरीक आनी एथनीक कपडे मेळत आसात. अहिल्या साडी स्टॉलार बनारसी सिल्क साडयांच्या खरेदी खातीर गर्दी आसा. परबांच्या सुवाळ्या खातीर तोरण म्हूण लावपा खातीर कड्डणा पसून तयार केल्ल्या तोरणांची विक्री जायत आसा.
जिल्हो ग्रामीण विकास यंत्रणेच्या चार विवीध हस्तकला आनी वस्तूंच्या स्टॉलाचेर सजावटीच्यो वस्तू, कपडे, कुणबी आनी ज्युटाच्यो पोतयो, बायलां गटांनी केल्लीं उत्पादनां गिरायक खरेदी करतना दिसून येता. इलेक्ट्रीक बायक्साच्या स्टॉलाचेरूय तरणाटे आनी बायलां भेटी दिवन खरेदी खातीर म्हायती घेतात.
होम शॉपांत टपवेराचीं उत्पादनां मेळटात. मॅजीक लॉकांत गॅसाची सुरक्षीतताय दाखयतात. तयार केल्लें भांगर, सौंदर्य प्रसाधनां, कपडे आनी ज्वेलरीच्या स्टॉला सयत पंचामृत उत्पादनांचो स्टॉल्स आनी आकर्शक फर्निचराच्या उत्पादनां कडेन गिरायक आकर्शीत जायत आसात. तशेंच फूड स्टॉलार गर्दी कायम आसून दत्ता भेल, भिंगी फुड्स, कॅफे मिरा हाचे सयत भेलपुरी, शेवपुरी, गोबी मंच्युरियन अशा विवीध प्रकारच्या खाद्यपदार्थांच्या स्टॉल्सांचेर गर्दी कायम आसा.
गोंय बेळगांव एक्स्पो हें प्रदर्शन आनी विक्री 11 जानेवारी मेरेन आशिल्ल्यान निमाण्या दिसाय खरेदीची संद गिरायकांक आशिल्ल्यान बेळगांवां खरेदी खातीर वचपा बदला एक्स्पोंतूच बेळगांवच्या नेमनेच्या उत्पादनांची खरेदी करूंक मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
