सांखळे आयज ‘कोंकणी श्रीराम गीता’

भांगरभूंय | प्रतिनिधी

मनोहरराय सरदेसाय जल्मशती वर्सा निमतान कार्यावळ

भांगरभूंय । प्रतिनिधी

दिवचलः मनोहरराय सरदेसाय जल्मशती वर्सा निमतान गोवा कोंकणी अकादेमी, गोंय राजभास संचालनालय आनी सांखळी रवीन्द्र भवन हांच्या जोडपालवान स्वरश्री गोवा निर्मीत, ज्येश्ठ संगितकार रामानंद रायकार हांणी संगीत दिल्ली ‘कोंकणी श्रीराम गीता’ हे रामचरित्राचेर आदारीत गितांची कार्यावळ शेनवारा 11 जानेवारीक आयोजीत केल्या. सांखळी रवीन्द्र भवनाच्या मुखेल सभाघरांत सांजेच्या 6.30 वरांचेर कार्यावळीक सुरवात जातली, अशी म्हायती पत्रकार परिशदेंत दिली.

ज्येश्ठ साहित्यीक मनोहरराय सरदेसाय हांणी कोंकणींतल्यान बरयल्ल्या रामायणांतल्या गितांक रामानंद रायकार हांणी चाली दिल्यात. हे संगीत कार्यावळीचे आतां मेरेन गोंयांत खूब कडेन तशेंच गोंया भायर लेगीत प्रयोग जाल्यात. आतां परतून नवे शैलींत, नव्या गायक- वादक कलाकारांच्या साथीन ही कार्यावळ जातली, अशें कार्यावळीच्या नेपथ्याची जापसालदारकी सांबाळपी गौरीश वेर्णेंकार हांणी सांगलें.

कोंकणी साहित्यांत कोंकणी श्रीराम गीता रचून मनोहरराय सरदेसाय हांणी सरस्वतीच्या आंगार एक अळंकार ओंपला. ताका संगीत दिवन ताचे खूबशे प्रयोग विवीध वाठारांनी जाले. सांखळे लेगीत रवीन्द्र भवनांत दिवाळी उत्सवांत ही कार्यावळ आयोजीत केल्ली. पूण कांय कारणांक लागून ती कार्यावळ रद्द करची पडिल्ली. आतां परतून एकदां सांखळेकारां खातीर हे कार्यावळीचें आयोजन केलां. ताचो लाव सगळ्यांनी घेवचो, अशें रामानंद रायकार हांणी ह्या वेळार सांगलें.

हे कार्यावळींत गायक कलाकार मंगेश शेट्ये, महेश सरदेसाय, भाविता नायक, ऋतुजा लोटलीकार, तशेंच संगीत कलाकार नवसो नायक (की बोर्ड), राजेंद्र परब (हार्मोनियम), जितेंद्र तांडेल (ताल गिटार), अतुल गुरव (हँडसोनिक), साईराज केरकार (तबला), महादेव गावडे (ऑक्टोपॅड) हांचो आस्पाव आसतलो. प्रमोद सुर्लकार आनी मानसी केरकार निवेदन करतले.

हे कार्यावळीक मुखेल सोयरे म्हूण मुख्यमंत्री डॉ. प्रमोद सावंत, मानाचे सोयरे म्हूण मुंबयचे शास्त्रीय गायक रघुनाथ फडके, सुवाळ्याचे अध्यक्ष म्हूण गोवा कोंकणी अकादेमीचे अध्यक्ष वसंत सावंत, खाशेले आमंत्रीत म्हूण सांखळी रवीन्द्र भवनाचे उपाध्यक्ष दत्ताराम चिमुलकार, सांखळी कोंकणी सेवा केंद्राचे अध्यक्ष राजन शेट्ये, उद्देजक सुनील सरदेसाय, नामनेचे फोटोग्राफर हिरेश मावजो हाजीर आसतले. पत्रकार परिशदेक रवीन्द्र भवनाचे संचालक दिनकर घाडी,  स्नेहा देसाय, अमोल बेतकीकार, रविराज च्यारी, कार्यावळ मुखेली लक्षराज आमोणकार, साईराज केरकार, नारायण करमळकार, रामानंद रायकार, राजन शेट्ये, सदानंद काणेकार हाजीर आशिल्ले.