भांगरभूंय | प्रतिनिधी
पणजी, डीआयपीः राना खात्यान 17 ते 19 जानेवारी 2025 मेरेन काणकोण म्हालांतल्या खोतिगांव वन्यजीव अभयारण्यांत 8 व्या गोंय पक्षी महोत्सवाचे आयोजन केला. तीन दिसांच्या महोत्सवांत सुकणी मोगी आनी वन्यजीव जाणकारांक गोंयच्या समृध्द अशा सुकण्यांच्या जीणेचो अभ्यास करपाची संद मेळटली. तशेंच सुकण्यांच्या जातींचो सांबाळ, वन्यजीव फोटोग्राफी, पक्षी पर्यटन, सुकण्यांची जीण आनी सुकण्यांचे शास्त्र अशा विशयांचेर महोत्सवांत भर दितले.
महोत्सवाची उक्तावण कार्यावळ 17 जानेवारी दिसा इंटरनॅशनल सेंटर गोंय, दोनापावला हांगा जातली. राना खात्याचे मंत्री विश्वजीत राणे हांच्या हस्तुकीं गोंय राना विकास म्हामंडळाच्यो अध्यक्ष आनी मुख्य सचिवांच्या उपस्थितीत महोत्सवाचे उक्तावण जातले. ह्या वेळार गोंयच्या सुकण्यांच्या जातीवयल्या दोन पुस्तकांचे विमोचन जातले. तशेंच गोंयच्या वन्यजीव अभयारण्यांच्या पक्षी मॅस्कॉटाचे अनावरण जातले.
महोत्सवा निमतान सुकण्यांच्या जीणेचेर पक्षीतज्ञांची व्याख्यानां आनी चर्चासत्रां जातली. उत्तराखंड राना विभागाचे प्रधान मुखेल राना संरक्षक आनी पक्षीतज्ञ डॉ. धनंजय मोहन, पक्षी छायाचित्रकार इंद्रजीत घोरपडे, पक्षीतज्ञ डॉ. प्रणय वैद्य, पर्यावरण तज्ञ डॉ. मधूरा निंफाडकार, पक्षीतज्ञ निरव भट हांची व्याख्यानां आनी चर्चासत्रां जातली.
ह्या महोत्सवांत वांटेकार जावपाक नोंदणी करपा खातीर https://birdfestival.goa.gov.in/ ह्या वेबसायटीक भेट दिवची. इत्सुकांक 14 जानेवारी मेरेन नोंदणी करपाक मेळटा. नोंदणी शुल्क 3500/- रूपया आसा आनी विद्यार्थ्यां खातीर 1000 रूपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
