भांगरभूंय | प्रतिनिधी
नवी दिल्ली, खबरां संस्था: बर्याच काळासावन चलत आयिल्ल्या समलिंगी लग्न प्रकरणाचेर सर्वोच्च न्यायालयान १७ ऑक्टोबर २०२३ दिसा एक म्हत्वाचो निकाल आयकयिल्लो. ते प्रमाण सर्वोच्च न्यायालयान समलिंगी लग्न कायदेशीर करपाक न्हयकार दिल्लो. मजगतीं, सर्वोच्च न्यायालयाच्या ह्या निर्णया आड पुनर्विचार याचिका दाखल केल्ली. पूण सर्वोच्च न्यायालयान ही पुनर्विचार याचिका न्हयकारल्या.
न्यायमूर्ती बीआर गवई, बी. वी. नागारत्ना, सूर्यकांता, पी.एस. नरसिंहा आनी न्यायमुर्ती दीपांकर दत्ता हांच्या खंडपीठान ही याचिका भायर मारली. ऑक्टोबर २०२३क आयकयल्ल्या निकालाचें अभ्यापूर्ण वाचन केलां. आमकां हातूंत हस्तक्षेप करपाची गरज ना, अशें सर्वोच्च न्यायालयान पुनर्विचार याचिका भायर मारतना म्हणलां.
सुनावणे मजगतीं खंडपीठान म्हणलें, एस. रवींद्र भट हांणी स्वतःच्या आनी हिमा कोहली हांचे वटेन दिल्ल्या निकालां सयत पामिघंटम नरसिंह हांणी उक्तायल्ले सहमतीचें मत आमी जतनायेन वाचलां. आमकां रेकॉर्डांत कसलीच त्रुटी दिसूंक ना. आमकां अशेंय दिसून आयलां, दोनूय निर्णयांनी उक्तायल्लें मत कायद्या प्रमाण आसा आनी हाका लागून हस्तक्षेप करपाची गरज ना.
२०२३त सर्वोच्च न्यायालयान नेमको कितें निर्णय दिल्लो?
भारताचे आदले सरन्यायाधीश डी. वाय. चंद्रचूड, न्यायमूर्ती एस. रवींद्र भट, हिमा कोहली आनी पी. एस. नरसिंहा हांच्या घटनापीठान १७ ऑक्टोबर २०२३ दिसा समलिंगी लग्नाक मान्यताय दिवपा आड निर्णय दिल्लो. तेन्नाचे सरन्यायाधीश डी. वाय. चंद्रचूड हांच्या नेतृत्त्वा खाला घटनापीठान इतिहासीक निकाल दितना म्हणिल्लें, सध्याचो कायदो समलिंगी जोडप्यांच्या लग्नाक मान्यताय दिना. फुडाराक हाची गरज आसल्यार ते खातीर कायदो करप हें संसदेचें काम. सर्वोच्च न्यायालयाच्या ह्या निर्णया उपरांत एलजीबीटीक्यू समूहाचेर व्हड परिणाम जाल्लो. तांणी तिडक उक्तायली. म्हणून पुनर्विचार याचिका दाखल केल्ली.
समलिंगी जोडपें मोलादीक अधिकार म्हणून लग्ना खातीर दावो करपाक शकना. तशेंच भुरगें दत्तक घेवपाचोय अधिकार तांचे कडल्यान काडून घेतला. तशेंच हो, हा निकाल आयकयतना सर्वोच्च न्यायालयान देशांतल्या पुलीस दळांक जायत्यो सुचवण्योय दिल्ल्यो.
-समलैंगीक समुदायांत भेदभाव जावचे ना हाची खात्र करात.
-वस्तू आनी सेवांचो लाव घेतना कसलोच भेदभाव जावपाक जायना.
-समलिंगी हक्कां विशीं जनतेक संवेदनशील करप.
-समलिंगी समुदाया खातीर हॉटलायन तयार करात.
-समलिंगी जोडप्यां खातीर सुरक्षीत घरांत तयार करात.
-आंतरलिंगी भुरग्यांचेर शस्त्रक्रिया करपाची सक्ती जावी ना. हाची खात्री करात.
-खंयच्याच मनशाक कसलेच तरेची हार्मोनल थेरपी घेवपाची सक्ती करची न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
