भांगरभूंय | प्रतिनिधी
मेरठ, खबरां संस्था: मेरठच्या लिसारी गेट वाठारांत एकाच कुटुंबांतले पांच वांगडी स्वताच्या घरांतूच मेल्ले अवस्थेंत सांपडले. पिडेस्तां मदीं एक दादलो, ताची बायल आनी तांच्या तिगा भुरग्यांचो आसपाव आसा. हीं तिनूय भुरगीं १० वर्सां पिराये सकयलीं आसात. ह्या जोडप्यांच्यो कुडी जमनीचेर सांपडल्यो. जाल्यार भुरग्यांच्यो कुडी खांटी पोंदाक मेळ्ळ्यो.
पुलिसांच्या म्हणण्या प्रमाण, मरण आयिल्ल्या सगळ्या कुडींच्या तकलेक घावे आशिल्ले. जड वस्तून मारिल्ल्याच्यो खुणो आसात. मरणाचें नेमकें कारण पोस्टमार्टमाचो रिपोर्ट आयले उपरांत स्पश्ट जातलें. मुळाव्या निरीक्षणा प्रमाण, वयक्तीक दुस्मानकायेन हे खून जाल्ल्याचें दिसता. घडणुके सुवातेर वरीश्ट अधिकारी हजर आसात. तपास वेगान सुरू आसा, अशें एसएसपी विपिन टाडा हांणी सांगलें.
भायर कुलूप आनी भितर मेल्ले मनीस
शेजार्यांनी दुबाव आयिल्ल्यान तांणी पुलिसांक सादूर केले आनी हे विशींची म्हायती दिली. थंय पावले उपरांत अधिकार्यांक घराक कुलूप लागिल्लें दिसलें. तांणी घराच्या पांख्या वेल्यान घरांत प्रवेश केलो आनी मुखार भिरांकूय चित्र तांचे नदरेक पडलें. त्या पांचय जाणांचे तकले दुखापत जाल्ली.
घडणुके सुवातेवेलें तें घर पुरायेन अस्ताव्यस्त आशिल्लें आनी आशिकुशीक मरण आयिल्ल्यो कुडी दिसल्यो. सगळ्यांत ल्हान चल्याची कूड एका साकांत खाटीच्या बॉक्सांत मेळ्ळी.
शेजार्यांनी सांगलें, बुधवारा सांजेवेळार पसून हें कुटूंब दिसूंक ना. हाका लागून हुस्को जालो आनी सोद घेतलो.
हे विशींची म्हायती दितना एसएसपी टाडा हांणी म्हणलें, घराक भायले वटेनच्यान कुलूप आशिल्लें. पुलिसांनी घराच्या पांख्या वेल्यान घरा भितर प्रवेश केलो आनी तांचे नदरेक मेल्ल्यो कुडी पडल्यो.
फॉरेन्सीक टीम घराची तपासणी आनी पुलीस हे घडणुकेची चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
