भांगरभूंय | प्रतिनिधी
श्री अमेय उच्च माध्यमीक विद्यालयान आयोजीत केली शिक्षकां खातीर कार्यशाळा
भांगरभूंय । खबरां मेज
पणजीः राष्ट्रीय शिक्षण धोरण (एनईपी) खऱ्या अर्थान लागू जातलें जाल्यार दरेका शिक्षकान वर्गांतले आपले शिकोवपाचे पद्दतींत व्हड बदल करपाक जाय, अशें शिक्षणतज्ञ प्रा. दिलीप बेतकीकार हांणी सांगलें.
कुर्टी उच्च शाळा चोंब्यान आयोजीत केल्ल्या शिक्षण विशींच्या परिसंवादांत खांडेपार- फोंडेंच्या एमआयबीके हायस्कुलाच्या सभाघरांत बेतकीकार उलयताले.
स्वस्तीक विद्यालय प्रियोळ, दादा वैद्य हायस्कूल कुर्टी, सेंट मॅरी हायस्कूल फोंडें, एमआयबीके हायस्कूल खांडेपार तशेंच श्री अमेय उच्च माध्यमीक विद्यालय कुर्टी ह्या शिक्षण संस्थांतले 100 शिक्षकांनी ह्या परिसंवादांत वांटो घेतिल्लो.
राष्ट्रीय शिक्षण धोरण चालीक लायतना विद्यार्थ्यांक तांचो चडांत चड फायदो जातलो, हें पळोवप म्हत्वाचें आसा, अशेंय प्रा. बेतकीकार हांणी सांगलें.
कुर्टी उच्च शाळा चोंब्याचे अध्यक्ष तशेंच श्री अमेय उच्च माध्यमीक विद्यालयाचे प्राचार्य सुभाष जाण हांणी येवकार दिलो आनी प्रास्तावीक केलें. फाटलीं 20 वर्सां कुर्टी शाळा चोंबो, माध्यमीक शिक्षकां खातीर नवे नवे उपक्रम चालीक लायता, अशें तांणी सांगलें.
मुख्यमंत्री गुरू वशिष्ठ पुरस्कार फावो जाल्ले मुख्याद्यापक शिरीशकुमार आमशेकार हांचो ह्या वेळार प्रा. बेतकीकार हांचे हस्तुकीं भोवमान केलो.
एप्रील 2024 चे धावी गोंय शालांत मंडळाचे परिक्षेंत सगळ्यांत बरे गूण घेतिल्ल्या दरेके एके शाळेंतल्या दरेकी दोन विद्यार्थ्यांचो ह्या सुवाळ्यांत भोवमान केलो. कुर्टी उच्च शाळा चोंब्याचे सचीव प्रा. संदीप शिलकार हांणी उपकार मानले. मेनका हजारे बुबा हांणी सुत्रसंचालन केलें. शबनम आगा, सुशांत उजगांवकार, शिरीशकुमार आमशेकार आनी लीना कोटा हे चारूय शाळांचे मुख्याध्यापक माचयेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
