भांगरभूंय | प्रतिनिधी
दिवचलः स्वरबहार संगीत मंडळ बोड्डें, कला आनी संस्कृती संचालनालय गोंय सरकार तशेंच भारतीय सांस्कृतीक संबंध परिशद मुंबय फांटो हांच्या जोडपालवान सर्गेस्त कृष्णा माशेलकार यादस्तीक 11 वें संगीत संमेलन शेनवारा 11 जानेवारीक आयोजीत केलां. सांजेच्या 5.30 वरांचेर दिवचलच्या सार्वजनीक गणेशोत्सव मंडळाचे माचयेर हें संमेलन जातलें, अशी म्हायती आयोजन समितीचे रघुनाथ परब, प्रेम प्रकाश नायक, पांडुरंग साळकार, शर्मिला मांद्रेंकार, मदन माशेलकार हांणी पत्रकार परिशदेंत दिली.
उक्तावण सुवाळ्याक मुख्यमंत्री डॉ. प्रमोद सावंत, आमदार डॉ. चंद्रकांत शेट्ये, नगराध्यक्ष कुंदन फळारी, जिल्हो पंचायत वांगडी सगूण वाडकार हाजीर रावतले. संगीत संमेलनांत पं . सुनीलकांत गुप्ता बासरी वादन सादर करतले. तांकां तबल्याचेर उदय कुलकर्णी संगीतसाथ दितले. पल्लवी पाटील गायन सादर करतली तांकां तबल्याचेर रोहिदास परब आनी हार्मोनियमाचेर बाबुराव माशेलकार साथ दितले. उकय गोखले व्हायोलीन वादन सादर करतले, तांकां तबल्याचेर रोहिदास परब साथ दितले. अतीश कारापूरकार अभंग सादर करतले, रेवा गांवस आनी प्रविणा गांवस नाट्यसंगीत सादर करतलीं. तांकां हार्मोनियमाचेर बाबुराव माशेलकार आनी तबल्याचेर रोहिदास परब साथसंगत करतले. विद्यार्थ्यां मदीं श्रीराम कळंगूटकार आनी सीताराम गांवकार हार्मोनियम सोलो वादन सादर करतले. मानसी शिरोडकार अभंग सादर करतली जाल्यार समृद्धी येंडे गवळण सादर करतली, अशें आयोजकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
