भांगरभूंय | प्रतिनिधी
वीज सांठोवपा खातीर थर्मर बॅटरी तयार करपाचोय विचार
पणजी : गोंयांत पवनचक्कीच्या आदारान 100 मेगावॅट विजेची निर्मिती करपाचो प्रस्ताव आसा. हे विशींची निविदा जारी जाल्या, अशें वीज मंत्री सुदिन ढवळीकार हांणी सांगलें. तशेंच पीक आवराची गरज भागोवपा खातीर वीज सांठोवन दवरपी स्टोरेज बॅटरी तयार करपाचो प्रस्ताव आसा.
मुंबयंत अक्षय उर्जेचेर आधारीत कार्यशाळा जाली. हे कार्यशाळेंत उलयतना वीज मंत्री सुदिन ढवळीकार हांणी ही म्हायती दिली. कार्यशाळेक केंद्रीय वीज राज्यमंत्री श्रीपाद नायक, केंद्रीय उर्जा मंत्री प्रल्हाद जोशी हाजीर आशिल्ले.
हरीत उर्जा तयार करपाक गोंय सरकार प्राधान्य दिता. हाचोच भाग म्हूण पवनचक्कीचेर आधारीत वीज निर्मिती करपाचे येत्न आसा. तशेंच वीज सांठोवन दवरपा खातीर दोन प्रकारच्या स्टोरेज बॅटरी तयार करपाचो प्रस्ताव आसा. 4 ते 5 वरां खातीर वीज सांठोवपाची तांक आशिल्ली बॅटरी तयार करतले. तशेंच 10 ते 12 वरां खातीर वीज सांठोवपाची तांक आशिल्ली कार्बन डायऑक्सायडाचेर आधारीत थर्मल बॅटरी तयार करपाचे येत्न आसात.
हरीत उर्जेचो वापर वाडपा खातीर मार्च 2026 मेरेन 7.5 एचपीचे 900 सोलर पंप शेतकारांक दिवपाचे उद्दिश्ट आसा. आतां मेरेन हे येवजणे खाला 350 अर्ज आयल्यात. हातूंतले 90 पंप बसोवन जाल्या. शेतकार तशेंच शेतकारांच्यो संघटणा सोलर पंप येवजणे खातीर पात्र आसात.
प्रधानमंत्री नरेंद्र मोदी हांणी घोशणा केल्ली पीएम सूर्यघर मुफ्त बिजली येवजणेची कार्यवाही सुरू जाल्या. हे येवजणे खाला घराचेर वीज निर्मिती खातीर 78 हजार रुपया मेरेन 3 किलोवॅट तांकीचे सोलर रूफ टॉप बसोवपाक मेळटा. 2027 मेरेन 65 मेगावॅट वीज तयार करपी 21200 सोलर रूफ टॉप बसोवपाची तजवीज आसा. सोलर रूफ टॉप बसोवपा खातीर 4500 अर्ज आयल्यात. हाचे पैकीं 477 सोलर रूफ टॉप बसयल्यात, अशें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
