भांगरभूंय | प्रतिनिधी
श्रीपाद नायकः पर्वरे म्हादय कृशी केंद्राचें दबाज्यान उक्तावण
भांगरभूंय । खबरां मेज
पणजीः ह्या संवसारांत बरे मनीस आसात म्हूण समाजीक संतुळाय आसा. समाजाक अर्थीक नदरेन सक्षम करपाचो बरो विचार घेवन मुखार वचप्यांक सगळे तरेचो आदार दिवप ही सगळ्यांचीच लागणूक आसा, अशें केंद्रीय मंत्री श्रीपाद नायक हांणी सांगलें.
पर्वरे म्हादय कृशी केंद्राच्या उक्तावण सुवाळ्यांत केंद्रीय मंत्री नायक उलयताले. तांचे वांगडा आदले उपसभापती नरहरी हळदणकार, आदले उपसभापती उल्हास अस्नोडकार, ओबीसी आयुक्त अॅड. मनोहर आडपयकार, पेन्हा द फ्रांकचे पंच राज शिरोडकार, माधव केळकार हाजीर आशिल्ले.
तरणाट्यांक स्वताच्या पांयांचेर उबे करप, गोंयांतल्या भाजी आनी फळ उत्पादकांक बाजारपेठ मेळोवन दिवप आनी गिरायकांक जैवीक भाजयो आनी फळां उपलब्ध करून दिवपाच्या उद्देशान माधव केळकार हांणी कांय उमेदी तरणाट्यांक लागीं करून म्हादय कृशी केंद्राची स्थापना केल्या.
लोकां मदीं काम करपाची वृत्ती सोंपिल्ल्यांत जमा जाल्या. चुकीच्या मार्गान पयसो जोडपा कडेन लोकांचो कल वाडत चल्ला. आमी समाजाचें देणें लागतात हें विसरत चल्ल्यात. गिरायक सेवा दितना म्हादय कृशी केंद्र समाजीक बांदिलकी सांबाळटलें हाचो आपल्याक पुराय विस्वास आसा, अशें केंद्रीय मंत्री नायक हांणी सांगलें.
बेरोजगारीचीं कारणां सोदून काडपाचो यत्न केलो तेन्ना आपल्याक दिसलें, गोंयकारांनी आपले परंपरीक उद्देग सोडून दिल्यात. आमचें शिक्षण सिद्धांत केंद्रीत जालां. वेव्हारीक शिक्षण दिनात. तरणाट्यां मदीं चवकसपणा, सतर्कता ना. गुंतवणूक करपाची तांक ना. ह्या सगळ्यांतल्यान मार्ग काडपाचो निर्णय घेतलो आनी हो वेवसाय सुरू केलो, अशें माधव केळकार हांणी सांगलें.
केळकार हांचो निर्णय तांचे समाजीक दायित्व सिद्ध करपी आसा अशें नरहरी हळदणकार
हांणी सांगलें.
लोकां कडेन पयसो आसा, पूण भलायकी ना. बरे भलायके खातीर जैवीक फळ- भाजयांचो स्विकार करात, असो सल्लो उल्हास अस्नोडकार हांणी दिलो.
फळ- भाजयांची बाजारपेठ विशिश्ट समाजाच्या ताब्यांत आसा. ही मक्तेदारी मोडून काडचे कातीर ह्या वेवसायाचें जाळें निर्माण करपाची गरज आसा, अशें अॅड. मनोहर आडपयकार हाणी सांगलें. ह्या वेळार राज शिरोडकार हांणीय आपले विचार मांडले. सगळ्या मानेस्तांनी केळकार हांणी घेतिल्ल्या म्हत्वकांक्षी निर्णयाक येवकार दिलो आनी तांचे वाटचालीक शुभेत्सा दिल्यो. मिलिंद गाडगील हांणी सुत्रसंचालन केलें जाल्यार वृंदा केळकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
