भांगरभूंय | प्रतिनिधी
गोंयां वतीन १.७६ टक्के निधीची मागणी : वित्त आयोग
पणजी : केंद्रीय येवजणे खाला गोंयांक ९० : १० प्रमाण निधी मेळचो. विकसीत भारत २०४७ खाला २०३७ मेरेन गोंयची उदरगत जावपाक आदर्श राज्य म्हणून गोंयांक फुडें हाडपाची गरज आसा. १६व्या वित्त आयोगा मुखार ही बाब मांडिल्लयाची म्हायती मुख्यमंत्री डॉ. प्रमोद सावंत हांणी दिली. मजगतीं, गोंयांन केंद्रीय निधींतल्यान १.७६ टक्के निधीची मागणी केल्ल्याचें वित्त आयोगाचे अध्यक्ष डॉ. अरविंद पनगारिया हांणी पत्रकार परिशदेंत सांगलें.
डॉ. पनगारिया हांचे अध्यक्षते खाला १६वो वित्त आयोग गोंय भेटीचेर आयला. आयज सकाळीं वित्त आयोगाची डॉ. सावंत आनी हेर मंत्र्यां वांगडा बसका जाली. हे बसकेक सरकारी अधिकारी हजर आशिल्ले. आयज आनी फाल्यां अशे दोन दीस वित्त आयोग गोंयांत आतले.
विवीध खात्यां खातीर सरकारान ३२७०६ कोटींची मागणी आयोगाकडेन केल्या. आग्नेय राज्यां खातीर सीएसएस येवजणे खातीर ९० : १० असो फॉर्म्युला वापरिल्लो. होच फॉर्म्युला गोंयांक लागू करचो, अशी मागणी सरकारान केली. पर्यटन, शिक्षण, पायाभूत सुविधा, शेती हाचे खातीर बरो निधी मेळचो म्हणून उपेगी सादरीकरण केल्ल्याचें डॉ. सावंत हांणी सांगलें.
कराच्या निधीचो वाटा ४१ टक्यां वेल्यान ५० टक्के करपाची मागणी : वित्त आयोग
कराच्या निधीचो वाटा ४१ टक्क्यां वेल्यान ५० टक्क्यां मेरेन वाडोवचो, अशी मागणी गोंय सरकारान केली. तशेंच निधीचो वाटा ०.३८६ टक्क्यांवेल्यान १.७६ टक्क्यां मेरेन वाडोवचो, अशी मागणी जाली. डॉ. पनगारिया हांणी पत्रकार परिशदेंत ही म्हायती दिली. ह्या वेळार हेर वांगडी आनी अधिकारी हजर आशिल्ले.
विवीध १३ प्रकल्पां खातीर गोंयांन ३२७४६ कोटी रूपया मागल्यात. गोंय हें पर्यटन राज्य. आकार आनी लोकसंख्या जरी उणी आसली तरी लोकसंख्ये परस चड लोक हांगा राविल्ल्यान आदले परस चड निधीची मागणी गोंयान केल्या. ह्यान पयलीं आमी १४ राज्यांक भेट दिल्या. गोंय हें १५ वें राज्य. राज्यांचे मागणेचो विचार करीत आयोग केंद्र सरकाराक निधी विशीं शिफारस करता. निमाणो निर्णय केंद्र सरकार घेता, अशे डॉ. पनगारिया हांणी म्हणलें.
१६ व्या वित्त आयोगाकडेन सरकारा वतीन ३७००० कोटींच्या निधीची मागणी केल्या. आपत्ती वेवस्थापन आनी कोयर वेवस्थापना खातीर निधीची मागणी केल्या, अशें मजूर मंत्री मोन्सेरात हांणी सांगलें, तर सरकारान न्हंय परीवहन खात्या खातीरी ६०० कोटी, जाल्यार दायज थळांच्या नुतनीकरणा खातीर १०० कोटींच्या निधीची मागणी केल्यास अशी म्हायती पुरातत्व खातें मंत्री सुभाष फळदेसाय हांणी सांगलें.
सरकारान मागण्यांचें सादरीकरण उत्कृश्टपणान केलां. फाटल्या वेळा परस अंदूं निश्चीतूच चड निधी मेळटलो, हाची खात्री आसा, अशें पंचायत मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
