भांगरभूंय | प्रतिनिधी
पणजी ः मुख्यमंत्री एलपीजी सिलेंडर सवलत येवजणे खाला लावार्थ्यांक दर म्हयन्याक 275 रुपयाचो फायदो मेळोवपा खातीर पुरावो म्हणून आधार कार्ड दाखोवप वा आधार ऑथेंटीकेशन प्रक्रिया करप सक्तीचें आसा. लावार्थ्यां कडेन आधार कार्ड नासल्यार नवें आधार कार्ड जारी जाय मेरेन रेशन कार्ड, मतदान कार्ड, पॅन कार्ड, बँक पासबुक, ड्रायव्हींग लायसन्स वळखपत्र म्हणून वापरूं येता.
हे संबंदी भौशीक पुरवण आनी गिरायक वेव्हार खात्याचे संचालक जयंत तारी हांणी जारी केल्ल्या अधिसुचोवणेंत सरकारी सेवांचो लाव घेतना आधार कार्ड वापरल्यार प्रक्रियेंत पारदर्शकता येता अशें सांगलां. आधार कार्ड आसल्यार लावार्थ्यांक हेर कसलेच कागदपत्रां बगर थेट सेवा सहजतायेन मेळूंक शकता. हे येवजणे खातीर आधार कार्ड सक्तीचें केलां कारण ताका लागून थेट लावार्थ्यांच्या खात्यांत पयशे घालप सोंपें जातलें.
हे येवजणेचो लाव घेवपाक सोदपी पात्र व्यक्तीं कडेन आधार कार्ड आसपाक जाय. ज्यांचेकडेन आधार कार्ड ना तांकां लागींच्या आधार केंद्रांत वचून नवें कार्ड करप गरजेचें आसा. त्या मनशाच्या घरालागीं तालुक्या पांवड्यार आधार केंद्र ना जाल्यार येवजण चालीक लावपी संस्थांनी अशी सुविधा उपलब्ध करुन दिवची. नवे आधार कार्ड मेळ मेरेन लावार्थ्यां कडल्यान आधार नोंदणी पावती आनी वयल्या वळखपत्रांचो पुरावो घेवन येवजणेचो लाव दिवचो अशें अधिसुचोवणेंत म्हणलां.
मेळिल्ले म्हायती प्रमाण, आंत्योदय अन्न रेशन कार्डा वरवीं गरीब कुटुंबांक सवलत दिवपा खातीर मुख्यमंत्री एलपीजी सिलिंडर येवजण सुरू केल्या. ते प्रमाण लावार्थ्यांक वर्साक तीन एलपीजी सिलिंडरांच्या खर्चा खातीर अर्थीक मजत दितात. ते प्रमाण लावार्थ्यांक म्हयन्याक 275 रुपया दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
