आदल्या आमदारांच्या सुचोवण्यांची घेतले दखलः मुख्यमंत्री

भांगरभूंय | प्रतिनिधी

विधानसभेंत गोंय विधिकार दीस मनयलो

पणजीः सरकारांक आदल्या आमदारांचे मार्गदर्शन गरजेचें आसा. देखून आदले आमदारांनी तांचे नदरेन येवपी गजाली पत्र बरोवन म्हाका धाडच्यो आनी तांच्यो सुचोवण्यो सरकार योग्य खात्याकडे धाडतले. तशेंच म्हादय आनी पाचवे शार गोंय हे विशयांचेर सरकार कार्य तत्परतेन काम करतले, अशें मुख्यमंत्री डॉ. प्रमोद सावंत हांणी सांगलें.
पर्वरी गोंय विधानसभेंत गोंय विधिकार दीस मनयलो. हे वेळार कार्यवळीक हजर आदले आनी आताचे आमदारांक मुख्यमंत्री संबोधित करताले. ह्या वेळार सभापती रमेश तवडकार, विरोधी पक्ष फुडारी युरी आलेमांव, आदले आमदार तशेंच गोंय विधिकार फोरमाचे वांगडी व्हीक्टर फर्नांनडीस आनी मोहन आमशेकार आनी हेर मानेस्त हाजीर आशिल्ले.
ह्या वेळार मुख्यमंत्र्यांनी उलयताना सांगलें, दर वर्सा एक दिसा खातीर आमी एका फोरमाचेर एकठांय येतात देखून ह्या दिसांक आमी चड महत्व दिवपाची गरज आसा. आमदार आसलो तेन्ना दोन फावटी ही कार्यावळ हावेन चुकयली पूण सभापती ते आतां मरेने ह्या कार्यवळीक हांव मुजरत भेट दिता.
तुमचे सगळ्या आदल्या आमदारांचे मार्गदर्शन गरजेचें आसा. ह्या कार्यावळीक आदले आनी आताचे आमदारान म्हादय आनी पाचवे शार गोंय हे सारिकिल्ले विशय मांडले. पूण म्हादय आनी पाचवे शार गोंय ह्या विशयाचेर सरकार 100 टक्के काम करता. वेगवेगळ्यो सुधारणा आनी अर्थिक तरतुदी वरवीं सरकार कार्य तत्पर आसा, अशें मुख्यमंत्र्यांनी सांगलें.
फकत ह्या फोरमाचे सुचोवण्यो दिवचे बरोबर आदल्या आमदारांन म्हजे कडेन पत्र वेवहार करचो. आदले आमदार शंभू भाऊ बांदेकार हे म्हाका वेगवेगळ्या विशयांचेर पत्रां बरयत आसाता. तशेंच हेर आदल्या आमदारांनी जे कितें गजाली तांच्या नदरेक येता त्यो तांचेनी म्हाका पत्र बरोवन कळोवच्यो. ताची दखल हांव स्वतः घेवन त्यो सुटाव्यो करपा खातीर संबंदीत खात्याक धाडून दितलो, असो उलो मुख्यमंत्र्यांनी मारलां.
मजगतीं, हे कार्यवळी निमतान वर्स 1989 ते 1994 मजगतीं आशिल्ले आमदारांचो मुख्यमंत्री डॉ. प्रमोद सावंत हांचें हस्तुकीं भोवमान जालो. हांतूत आदले सांताक्रुझचे काँग्रेसीचे आमदार व्हीक्टर गोन्साल्वीस, सांत आंन्देचे अपक्ष आमदार डॉ. कार्लो पेजाद, कुंभारजुव्यांचे मगोचे आदले आमदार धर्मा चोडणकार, कालयचे मगोचे आमदार विनयकुमार उसगांवकार, वेळ्ळीची काँग्रेसीची आमदार फेरेल फुतार्दो, सावड्डेंचे मगोचे आमदार मोहन आमशेकार, कुडचडचें काँग्रेसीचे आमदार डोमनीक फर्नानडीस, लोटलीचे अपक्ष आमदार राधाराव ग्रासियस हांचो आस्पाव आशिल्लो.