भांगरभूंय | प्रतिनिधी
सुदिन ढवळीकार : अंतर्गत वीज वाहिन्यां सयत राज्यभर जायतीं कामां सुरू आसात
पणजी : वीज मंत्री म्हूण जापसालदारकी सांबाळ्ळे उपरांत फाटल्या दोन वर्सांत खात्या वतीन विवीध कामां खातीर 5 हजार कोटींच्यो निविदा काडल्यात. तातूंतलीं खूबशीं कामां सध्या सुरू आसात, अशें मंत्री सुदिन ढवळीकार हांणी बुधवारा पत्रकारां कडेन उलयतना सांगलें.
फाटलीं दोन वर्सां आमी राज्यांतल्या विजे विशीं उपाय काडटना थळाव्यांच्यो सगल्यो समस्या सोडोवपाचेर भर दिला. ते खातीर ट्रान्सफॉर्मर, जीर्ण जाल्ल्यो वीज वाहिन्यो बदलप, उपकेंद्रां अद्ययावत करप अशीं जायतीं कामां राज्यभर सुरू आसात. बार्देस म्हालाक पर्यटनाचे नदरेन म्हत्व आसा. ताका लागून ह्या म्हालांतल्यो समस्या सोडोवपाचेर भर आसून थंयच्या कामांचेर सुमार 350 कोटी रुपया खर्च जातलो. हीं सगलीं कामां फुडल्या एका वर्सांत पुराय जातलीं, अशेंय ढवळीकार हांणी सांगलें.
मजगतीं, स्मार्ट मिटरां खातीर निविदा प्रक्रिया पुराय जाल्या. हे विशीं सरकारी पांवड्यार फुडली प्रक्रिया सुरू आसा, अशेंय तांणी नमूद केलें.
तीन म्हयन्यांत आनीक
20 चार्जींग स्टेशनां
फाटल्या दोन म्हयन्यांत राज्यांत 20 चार्जींग स्टेशनां उबारल्यांत. फुडल्या तीन म्हयन्यांत वेगळ्यावेगळ्या वाठारांनी आनीक 20 स्टेशनां उबारतले. इलेक्ट्रीक वाहनां आशिल्ल्यांक कसलोच त्रास जावचो न्हय हे खातीर जतनाय घेतात, अशें मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
