भांगरभूंय | प्रतिनिधी
बेळगांवची खरेदी करूंक मेळटली गोंयांतूच; आकर्शक इनामांचो आस्पाव
मडगांव: प्रुडंट मिडिया नॅटवर्का वतीन मडगांवां बीपीएस स्पोर्टस क्लबांत 9 ते 11 जानेवारी मजगतीं, गोंय-बेळगांव एक्स्पो 2025 चें आयोजन केलां. ह्या एक्स्पोचें उक्तावण मुखेल सोयरे सभापती तशेंच काणकोणचे आमदार रमेश तवडकार हांचे हस्तुकीं दनपारां साडेतीन वरांचेर जातलें. ह्या वेळार कॉमेडियन जॉनी डिकॉस्टा हांचे सयत विवीध मानेस्तांची हाजेरी आसतली.
प्रुडंट मिडिया नॅटवर्का कडल्यान बेळगांवच्या विवीध नामनेच्या आस्थापनांचो वांटो आशिल्लें प्रदर्शन आनी विक्रीचो नवो उपक्रम राबयला. बेळगांवां खरेदी खातीर वचप्यांक आतां बेळगांवची खरेदी गोंयांतूच करूंक मेळटली. तांकां बेळगांवां वचपाची गरज पडची ना. मडगांवच्या बीपीएस स्पोर्टस क्लबांत 9 ते 11 जानेवारी मजगतीं, सकाळीं 11 ते रातच्या 9 वरां मेरेन प्रदर्शन आनी विक्री गिरायकां खातीर उक्ती आसतली. गोंय-बेळगांव एक्स्पोंत बेळगांव आनी गोंयांतल्या सुमार 66 आस्थापनांनी वांटो घेतला.
ह्या प्रदर्शन आनी विक्रींत फर्नीचर, ल्हान भुरग्यां पसून व्हडा मेरेनचे रेडिमेड कपडे, घरा खातीर गरजेच्यो वस्तू, जोत्यांचीं दुकानां, जिणेगरजेच्यो वस्तू, 1 ग्राम भांगरा पसून तयार केल्ल्यो वस्ती, हार्डवेर हाचे सयत बँकींग, आयुर्वेद, भलायकी विशीं म्हायती दिवपी विवीध स्टॉल्स आसतले.
बेळगांवां खरेदी करपा बदला बेळगांवचीं दुकानां गोंयकारांचे सेवेंत हजर रावत आशिल्ल्यान मनमेकळी खरेदी करूंक मेळटली. तशेंच बेळगांव आनी गोंयच्या नेमनेच्या अन्नपदार्थांच्या आस्थापनांचो सहभाग आशिल्ल्या फुडकोर्टांत मटन भाकरी सयत विवीध डिशींचो स्वाद चाखूंक मेळटलो. प्रदर्शन आनी विक्रीच्या उपक्रमा वेळार सांस्कृतीक कार्यावळींचें आयोजनूय केलां. तशेंच विवीध सर्ती लेगीत घेतले.
गोंय-बेळगांव एक्स्पोंत वांटेकार जावपी गिरायकांक विवीध आकर्शक इनामां जिखपाची संदूय प्रुंडट मिडिया नॅटवर्का कडल्यान दिल्या आनी ते खातीर विवीध सर्ती घेतात. हे खातीर एक्स्पोंत येवपी दरेका गिरायकाक लकी ड्रॉत वांटो घेवन इनामां जिखपाचीय संद आसतली.
ह्या एक्स्पोच्या तिनूय दिसांनी दनपारच्या सत्रांत ‘जरा हटके’ ही कार्यावळ जातली. हातूंत बायलां खातीर पाककला सर्त, भुरग्यां खातीर चित्रकला सर्त आयोजीत केल्या. 6 ते 10 वर्सा आनी 11 ते 14 वर्सा पिरायेच्या गटां मदीं ही सर्त जातली. आयोजकां कडल्यान चित्रकले खातीर फक्त कागदाची पुरवण करतले. रंग आनी हेर साहित्य स्पर्धकांनी हाडचे पडटलें. गोंय-बेळगांव एक्स्पोक लागून फक्त खरेदीच न्हय जाल्यार मनरिजवण, सर्त, आकर्शक इनामांचो खजिनोच गिरायकां खातीर हाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
