भांगरभूंय | प्रतिनिधी
पणजीः दोनूय वटांनी धोलपी सांस्कृतीक परंपरा आनी खोल अध्यात्मीक म्हत्व सांगतना थ्री किंग्स (तीन रायांचें) फेस्तान थळाव्यांक आनी भेट दिवप्यांक मोहीत केलें. ह्या फेस्तान श्रद्दा, संस्कृती आनी परंपरा हांचे मदले खोल रुजिल्ले संबंद मनोवन पर्यटक आनी उत्सवांत वांटो घेवपाक आयिल्ल्यांक गोंयचें गिरेस्त दायज पळोवपाची संद दिली.
पर्यटन मंत्री रोहन खंवटे, जीटीडीसीचे अध्यक्ष डॉ. गणेश गांवकार, पर्यटन संचालक सुनील अंचिपाका (आयएएस) आनी जीटीडीसीचे वेवस्थापकी संचालक कुलदीप आरोलकार हांणी ह्या आगळ्या फेस्ताक तेंको दिल्लो. गोंय पर्यटन विकास म्हामंडळाचो (जीटीडीसी) पंगड, म्हावेवस्थापक गेवीन डायस आनी उपम्हावेवस्थापक दीपक नार्वेंकार हांच्या फुडारपणा खाला हेर पंगडांतले वांगडी ह्या फेस्तांत सक्रीय वांटेकार जाल्ले.
फेस्ता विशीं विचार मांडटना डॉ. गांवकार हांणी सांगलें, थ्री किंग्स फेस्त हो फकत विस्वासाचो उत्सव नासून ती गोंयच्या सांस्कृतीक अस्मितायेची जिवी अभिव्यक्ती आसा. अंदूंच्या फेस्तान दायज आनी परंपरेची एकवटीत शक्त दाखयली. संवसारभरांतल्या पर्यटकांक आकर्शीत केले. गोंयचें सोबीत आकर्शण दाखोवपी अश्या कार्यावळींक उर्बा दिवपाक आमी बांदील आसात.
कासावली, चांदोर आनी रेईश मागोश ह्या सैमान नटिल्ल्या गांवांत हो उत्सव मनयलो. तातूंत सांस्कृतीक अणभवांची एक गिरेस्त श्रेणी आशिल्ली. धर्मीक मिरवणुको आनी थळाव्या चर्चींनी पर्यटकांची थळाव्या लोकांनी बरी सरबराय केली. जे वरवीं भक्ती आनी जातीय एकचार वाडोवपाक मजत जाली.
ज्ञानी व्यक्तींचें प्रतिनिधीत्व करपी तीन तरण्या चल्यांनी, रस्त्या वयल्यान प्रतिकात्मक कालातींत परंपरेचें चित्रपण दाखोवपाक योगदान दिलें. परंपरीक संगीत, नाच सादरीकरण आनी सामुदायीक कार्यावळींनी फेस्ताचे उमेदीन भर घातली. संवसारभरांतल्या पर्यटकां वांगडा फेस्ताची काणी शॅर करचे खातीर डिजिटल माध्यमां, इन्फ्लुएन्सर्स भागिदारी आनी मिडिया आवटरीचो वापर करून नाविन्यपूर्ण प्रचार मोहीमे वरवीं फेस्ताचें संवसारीक आकर्शण वाडयलें. तशेंच गोंय पर्टयनान चर्चीच्या प्राकारांत स्टॉल घातिल्लो. तातूंत पर्यटकांक उपलब्ध आशिल्ल्या सेवां विशीं मोलादीक म्हायती दिवन तांकां भेटवस्तू आनी नाश्तो लेगीत दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
