भांगरभूंय | प्रतिनिधी
फोंडें: मडकयच्या नवदुर्गा मंदिराच्या मंडपांत श्री नवदुर्गा कला संघ मडकय तशेंच कला आनी संस्कृती संचालनालय हांच्या जोडपालवान आयोजीत 3 रें देवी नवदुर्गा शास्त्रीय संगीत महोत्सव 12 जानेवारीक आयोजीत केलां. मडकयचे सरपंच शैलेंद्र पणजीकार आनी राज्य पुरस्कार जैतवंत धर्मानंद गोलतकार हांचे हस्तुकीं दिवली पेटोवन महोत्सवाचें उक्तावण जातलें. ही म्हायती प्रा. नामनेदव नायक हांणी पत्रकार परिशदेंत दिली. ह्या वेळार नवदुर्गा कला संघाचे अध्यक्ष ज्ञानेश्वर नायक, सुशांत नायक आनी तबलावादक रामदास नायक हाजीर आशिल्ले.
उक्तावण सुवाळ्या उपरांत सकाळीं 10 वरांचेर ज्ञानेश्वर नायक हांचें शास्त्रीय गायन जातलें. उपरांत डॉ. राजू पेडणेंकार आनी गौरीश तळवलकार हांचें शास्त्रीय गायन जातलें. दुसऱ्या सत्रांत दनपारां 3 वरांचेर शुभम रघुवीर फडते हाचें बासुरी वादन जातलें. सांजेच्या 4 ते 7 वरां मदीं रेषा प्रभू, आनंद सालेलकार आनी किरण रायकार हांचें शास्त्रीय गायन जातलें. तांकां तबल्याचेर मृणाल परब, रामदास नायक, प्रेमानंद आमोणकार, शैलेश म्हार्दोळकार, भारत बाणावलीकार, गोरखनाथ सावंत आनी पंडीत तुळशीदास नावेलकार हे साथसंगत करतले. हार्मोनियम साथ गोपाळ तळवलकार, महेश धामस्कार, जयेंद्र गोवेकार, प्रदीप नायक गावणेंकार, नंदा कळंगूटकार आनी दिलीप गडेकार हे कलाकार करतले. सुशांत नरसिंह नायक हे सुत्रसंचालन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
