भांगरभूंय | प्रतिनिधी
पणजी : आयज पर्वरे मंत्रालयांत जाल्ले बसके उपरांत मुख्यमंत्र्यांनी पत्रकारां कडेन संवाद केलो. मजगतीं सरकारी नोकरेची पदां भरपाची प्रक्रिया फुडले २ म्हयने चालूच उरतली. मात, पात्र थारिल्ल्याची नेमणूक एप्रील म्हयन्या उपरांतूच करतले, अशी म्हायती ह्या वेळार मुख्यमंत्री सावंत हांणी दिली.
वित्त खात्याचे अवर सचीव प्रणब भट हांणी, काल अर्थीक वर्सा निमाण्यां तीन म्हयन्यांत बजेट तरतुदींत २० टक्क्यां परस चड रक्कम खर्च करची न्हय, नोकरेचीं नवीं पदां निर्माण करचीं न्हय अशे निर्बंद घालीत हे विशींचें परिपत्रक जारी केल्लें. भरती आडकून उरतली काय असो भंय नोकरभरती खातीर इत्सूक आशिल्ल्या तरणाट्यांक दितालो. आयज मुख्यमंत्र्यांनी पत्रकार परिशदेंत हे विशींचे गैरसमज पयस केल्ल्यान तरणाट्यांक मात्शें समाधान जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
