भांगरभूंय | प्रतिनिधी
नवी दिल्ली, खबरां संस्था: केंद्र सरकाराच्या राष्ट्रीय सांख्यिकी कार्यालयान (एनएसओ) जाहीर केल्ल्या पयल्या आगाऊ अदमासा प्रमाण २०२४-२५ वित्तीय वर्सा भारतीय अर्थवेवस्थेची वाड ६.४ टक्क्यां मेरेन देंवतली. फाटल्या चार वर्सांतलो हो सगळ्यांत उणो वाड दर आसतलो आनी रिझर्व्ह बँकेन हालींच सुदारीत केल्ल्या ६.६ टक्क्यांच्या अदमासा परस तो उणो आसा. वाडीचो दर मंद जातलो तरी संवसारांतल्या सगळ्यांत नेटान वाडपी अर्थवेवस्थेची पदवी भारत तिगोवन दवरतलो.
एनएसओन जारी केल्ल्या पयल्या आगाऊ अदमासा प्रमाण कोरोना व्हायरसा उपरांत चार वर्सांत पयलेच खेपे वाड दर ७ टक्क्यां सकयल देंवपाची शक्यताय आसा. फाटल्या अर्थीक वर्सा (२०२३-२४) एकूण देशांतल्या उत्पादनांत (जीडीपी) वाड दर ८.२ टक्के नोंद जाल्ली. ताचे तुळेंत अंदूं १.८ टक्क्यांनी देंवपाचो अदमास आसा. अर्थवेवस्थेन बरे तरेन कामगिरी करून शिक्षणीक वर्साच्या पयल्या तिमाहींत ६.७ टक्क्यांनी वाड नोंद जाल्या. दुसर्या म्हळ्यार जुलय ते सप्टेंबर तीन म्हयन्यांत वाडीचो दर दोन वर्सांत सकयल्या पांवड्यार ५.४ टक्क्यांनी देंवलो. मुखेलपणान शारांतल्या गिरायकां कडल्यान मागणी आनी उत्पादन उणें जाल्ल्यान तशेंच खण मळावेले वायट कामगिरीक लागून अर्थवेवस्थेची वाड उणी जाल्या.
ताज्ज्या आंकड्यां प्रमाण, पयल्या अर्दांत अर्थवेवस्थेंत सरासरी ६ टक्क्यांनी वाड जाल्या आनी दुसर्या अर्दांत अर्थवेवस्था वाडटली तरी ती सरासरी ७ टक्क्यां सकयल उरपाची शक्यताय आसा. फाटल्या सप्तकांत जाहीर केल्ल्या मुखेल अर्थीक आंकडेवारींतय मिश्र प्रवृत्ती दिसून आयल्या. सेवा क्षेत्रांत फाटल्या डिसेंबरांत चार म्हयन्यांतली चड क्रियाशीलताय दिसून आयली, जाल्यार उत्पादन वाड मंद जावन १२ म्हयन्यांच्या उण्या पांवड्यार पावली. एके वटेन ‘युनिफायड पेमेंट्स इंटरफेस’ म्हळ्यार यूपीआय लिंक केल्ल्या फारीकणींचो आंकडो वाडत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
