भांगरभूंय | प्रतिनिधी
बंगळुरू, खबरां संस्था: भारतीय अंतराळ संशोधन संस्था म्हळ्यार इस्रोचे (ISRO) नवे मुखेली म्हणून डॉ. व्ही. नारायणन हांची नियुक्ती केली. १४ जानेवारीक डॉ.व्ही.नारायणन हे इस्रोचे सध्याचे मुखेली डॉ.एस. सोमनाथ हांचे कडल्यान इस्रोचे मुखेली म्हणून पदभार स्वीकारतले. डॉ. व्ही. नारायणन हे सध्या लिक्विड प्रोपल्शन सिस्टीम सेंटर (LPSC) चे संचालक आसात. डॉ.एस. सोमनाथ हे तांचो दोन वर्सांचो कार्यकाळ पुराय करून १४ जानेवारीक निवृत्त जातले. तांचे सुवातेर आतां डॉ. व्ही. नारायणन हांच्या नियुक्तीची घोशणा मंगळारा केली.
डॉ.व्ही.नारायणन हांणी भारतीय अंतराळ संस्थेत (इस्रो) विवीध म्हत्वाच्या पदांचेर काम केलां. लिक्विड प्रोपल्शन सिस्टीम सेंटराच्या संचालक पदाच्या पुराय कार्यकाळांत डॉ. नारायणन हांच्या मार्गदर्शनाखाला इस्रोच्या विवीध मोहिमां खातीर १८३ लिक्विड प्रोपल्शन सिस्टम्स आनी कंट्रोल पॉवर प्लांट्स वाटल्यात. तांणी सुमार चार दसकां इस्रोंत जायत्या म्हत्वाच्या पदांचेर काम केलां. रॉकेट आनी स्पेसक्राफ्ट प्रोपल्शन हातूंत ते तज्ञ आसात. तांणी GSLV Mk III च्या C25 क्रायोजेनीक प्रकल्पाचे प्रकल्प संचालक म्हणून केलां. तांच्या फुडारपणा खाला C25 स्टेज यशस्वीपणान विकसीत केलें. हाचे वांगडा डॉ.व्ही.नारायणन हांणी आदित्य अंतराळयान आनी GSLV Mk-III मिशन्स आनी चांद्रयान-२ आनी चांद्रयान-३ च्या मोहिमेंतूय तांणी म्हत्वाचें योगदान दिलां. भारतीय अवकाश संशोधन मळावेलें तांचें योगदान तोखणाय करपा सारकें आशिल्ल्यान तांचो अणभव आनी नेतृत्वाची तांक इस्रोक मखार व्हरपाक म्हत्वाचें थारतलें.
पुरस्कार फावो जाल्यात
डॉ. व्ही. नारायणन हांकां आतां मेरेन जायते पुरस्कार फावो जाल्यात. तांकां आयआयटी खरगपूर कडल्यान रुपें जाल्यार स्ट्रोनॉटिकल सोसायटी ऑफ इंडियान (ASI) तांकां भांगरा पदक दिवन भोवमान केला. तशेंच एनडीआरएफानूय तांचो भोवमान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
