भांगरभूंय | प्रतिनिधी
नगरसेवकांक कर घेवपा विशीं योग्य म्हायती नाशिल्ल्यान गैरसमज
मडगांव : सोपो ठेकेदारा कडल्यान दुकानांचो परवानो आशिल्ल्या विक्रेत्यां कडल्यान तशेंच चड कर घेतिल्ल्याचो आरोप नगरसेवकांनी पालिका मंडळाचे बसकेंत केल्लो. हे विशीं मुख्याधिकारी मेलविन वाझ हांणी त्याच दिसा चवकशी केल्या. तेन्ना कसलेच तरेच चड कर घेनात. नगरसेवकांक पुराय म्हायती नाशिल्ल्यान हो मुद्दो बसकेंत काडलो अशें वाझ हांणी सांगलें.
मडगांव पालिका मंडळाची बसका शुक्रारा जाली. हे बसकेक सोपो कराचेर चर्चा जाली. तेन्ना पालिके वतीन नवो सोपो निविदे वरवीं ज्या ठेकेदाराची नेमणूक केल्या ते परवानो आशिल्ल्या दुकानदारां कडल्यानूय कर घेतात. नगरसेवक पुजा नायक, राजू नायक आनी हेरांनीय हो विशय ओडून धरिल्लो.
नगराध्यक्ष दामोदर शिरोडकार हांणी, कांय जाणांनी आपणाक सोपो कर कित्याक घेता हाचें कारण दिनासतना पयशे घेता अशी म्हायती मेळ्ळ्या. तेन्ना मुख्याधिकारी मेलविन वाझ हांचे कडल्यान सोपो कर गोळा करपाक नेमणूक करपी ठेकेदाराक आपोवन ह्या विशयांचेर चर्चा करुन अटी आनी नेम पाळपाक सांगतले. तशेंच नगरसेवकांनी केल्ल्या आरोपांचेरूय विचार करतले अशें तांणी सांगलें.
ते प्रमाण मुख्याधिकारी मेलविन वाझ हांकां विचारलें तेन्ना, नगरसेवकांनी चड कर घेतिल्ल्याच्या आरोपांत कांयच सत ना. ठेकेदाराक आपोवन चवकशी केली. पावत्यांविशींय चवकशी केल्या. मात कसलीच चड कर घेतिल्ल्याचें वा चुकीचो कर घेतिल्ल्याचें दिसून येवंक ना. नगरसेवकांक ह्या कराच्या आकारणी विशीं पुरायेन म्हायती नाशिल्ल्यान तांचो गैरसमज जाल्ल्यानूच हो विशय पालिका मंडळाचे बसकेंत काडला आसतलो, अशेंय तांणी म्हणलें. नगरसेवकां वतीन पालिका मंडळाचे बसकेंत आरोप करून सोपो ठेकेदाराचेर आरोप केल्ल्यान आतां मुख्याधिकार्यांनी सोपो ठेकेदाराक क्लिनचीट दिल्ल्याचें दिसून येता.
एसजीपीडीए मार्केटा भायलो कर पालिकेचोच : मुख्याधिकारी
एसजीपीडीए मार्केटाचे राखणे वणटी भायले सुवातेर परंपरीक नुस्तें विक्रेत्यांक वेवसाय करपा खातीर परवानगी दिल्या. ती सुवातूय पालिका प्रशासनाचे अखत्यारींत येता. ह्यान पयलीं थंय नुस्तें विकपाक बसपी विक्रेत्यां कडल्यान मडगाव पालिका कर्मचारीच सोपो वसूल करताले. एसजीपीडीएचे कार्यक्षेत्र हें मार्केटांत आशिल्ल्यान घाउक मासळी विक्रेत्यां कडल्यान ते कर एकठांय करपाचो आसा. आतां चड पयशे एकठांय करपा खातीर मार्केटा भायर येवन पयशे घेतात. पुलिसांकूय मार्केटा भायली सुवात पालिकेच्या ताब्यांत येता अशें सांगलां, अशेंय मुख्याधिकारी वाझ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
