भांगरभूंय | प्रतिनिधी
पणजी : कॉंग्रेसींतल्यान भाजपांत प्रवेश केल्ल्या ८ आमदारांच्या अपात्रते विशीं सभापती रमेश तवडकार हांणी दिल्ल्या आदेशाक उच्च न्यायालयांत आव्हान दिलां. सर्वोच्च न्यायालयाचे सुचवणे प्रमाण गिरीश चोडणकार हांणी उच्च न्यायालयांत याचिका दाखल केल्या. मेळिल्ले म्हायती प्रमाण १५ जानेवारीक हे विशीं सुनावणी जातली.
सर्वोच्च न्यायालयांत हे विशींचे सुनावणे मजगतीं, सभापतींच्या आदेशा आड घटनेच्या कलम १३६ खाला याचिका दाखल जाल्या. कलम १३६ प्रमाण सर्वोच्च न्यायालय हे विशीं सुनावणी करपाक शकना अशें सरन्यायाधीश संजीव खन्ना हांणी स्पश्ट केल्लें. सरन्यायाधीश संजीव खन्ना हांणी चोडणकारांक कलम २२६ प्रमाण उच्च न्यायालयांत वचपाचे निर्देश दिले. उपरांत चोडणकारांनी ही याचिका फाटीं घेतली.
सप्टेंबर २०२२त कॉंग्रेसीचे दिगंबर कामत, आलेक्स सिक्वेरा, संकल्प आमोणकार, रुडॉल्फ फर्नांडीस, मायकल लोबो, दिलायला लोबो, केदार नायक, राजेश फळदेसाय ह्या आठ आमदारांनी वेगळो गट स्थापन करून भाजपांत प्रवेश केलो. गिरीश चोडणकर हांणी सभापतीं कडेन ह्या आठ आमदारांक अपात्र करपाची मागणी करपी याचिका दाखल केल्ली. सभापती रमेश तवडकार हांणी तांची याचिका भायर मारली. उपरां चोडणकार हांणी नोव्हेंबरांत सरळ सर्वोच्च न्यायालयांत आव्हान याचिका दाखल केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
