भांगरभूंय | प्रतिनिधी
भोपाळ, खबरां संस्था ः भगवान श्रीरामाची तपोभूमी चित्रकूट हें संवसारीक धर्मीक आनी पर्यटन थळ म्हूण उदरगत करपाची येवजण मध्य प्रदेश सरकारान तयार केल्या. रामायण काळाक संबंदीत आशिल्ल्या शारांनी आनी सुवातींनी आधुनीक येरादारी सेवा विकसीत करपा खातीर 750 कोटी रुपया खर्च करतले. ते खातीर डीपीआर तयार केला. पुराय शारांत श्री रामाची प्रतिमा आसतली. ते खातीर रामायण एक्सपीरियन्स पार्क 80 एकरांत बांदतले. तातूंत प्रभू श्रीराम, माता सीता आनी लक्ष्मण हांच्यो व्हड मूर्ती आसतल्यो. तशेंच रामायण स्थळांची प्रतिकृती, 5 डी – 3 डी होलोग्राम आनी लायट-साउंडय आसतले. आधुनीक सुविधां कडेन खासा लक्ष दितले. ते भायर मंदाकिनी न्हंयचेर एक अतिरिक्त सेतू बांदतले.
राजोला गांवांत 80 एकरांत रामायण एक्सपीरियन्स पार्क उबारतलें. ताचेर 100 कोटी रुपया खर्च जातलो. ह्या पार्कात भगवान श्री रामाची 151 फूट उंचायेची मूर्त उबारतले. 5D आनी 3D सादरीकरणा वरवीं भक्तांक रामायण काळांतल्या घडणुकांचे जिवीत दृश्य पळोवंक मेळटलें.
० संतां खातीर आशिल्ल्या आध्यात्मिक-ध्यान केंद्रांत 1000 संत रावूंक शकतात. तशेंच पुराय सुविधा आशिल्ली कॉटेजां आसतली, सांस्कृतीक केंद्र आसतलें.
० आध्यात्मिक वाचनालय, हर्बल गार्डन आनी गोशाळा आसतली. मोकमगढ किल्लो, सती अनुसाय देवूळ, गुप्त गोदावरी, मंदाकिनी जानकी कुंड, कामदगिरी परिक्रमा, स्फटीक शिला आदी रामायणांतल्यान म्हत्वाचीं थळां विकसीत करतले.
० हनुमान धारात 24 कोटी रुपयांत 3750 चौखण मिटरांत फॅसिलिटी सेंटर, नयगांवांत 51 कोटी रुपयांत येरादारी कक्ष बांदतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
