भांगरभूंय | प्रतिनिधी
मेरठ, खबरां संस्था: भारतांतल्या शारांनी बरें आनी दर्जो आशिल्लें हॉटेल सोदपा खातीर ‘ओयो’ बरेंच लोकप्रीय आसा. मात आतां ‘ओयो’न आपल्या नेमांनी व्हड बदल केल्यात. ह्यान फुडें लग्न जावंक नाशिल्ल्या जोडप्यांक ‘ओयो’ हॉटेलांनी सरळ एन्ट्री मेळची ना. आतां मेरेन मोगान आशिल्ल्या जोडप्यांक म्हणल्यार लग्न जावंक नाशिल्ल्या जोडप्यांक ‘ओयों’त रोखडोच रूम बूक करपाक मेळटालो. मात आतां हाचेर बंदी घाल्या. उत्तर प्रदेशांतल्या मेरठ शारांतल्यान हे नवे नेम पयलेच फावट लागू केल्यात.
पीटिआयन दिल्ले म्हायती प्रमाण, ‘ओयो’न लग्न जावंक नाशिल्ल्या जोडप्यांक सरळ एन्ट्री दिवपाचेर बंदी हाडल्या. जर ह्यान फुडें जोडप्यांक ‘ओयों’त रूम बूक करपाचो आसल्यार तांकां तांच्या लग्नाचो पुरावो दिवचो पडटलो. हो नेम ऑनलायन बुकिंगा खातीरूय लागू केला. हे नेम बेगोबेग लागू करचे अशें निर्देश ‘ओयो’न मेरठच्या सगळ्या हॉटेलांक दिल्यात.
ओयो कंपनीन सांगलें, हो बदल केले उपरांत मेरठचो अणभव घेवन हेर शारांनीय अशेच तरेचे बदल घडोवन हाडटले. मेरठ सयत हेर कांय शारांतले नागरीक ‘ओयो’कडेन हे विशीं विचारतात. ‘ओयो’ हॉटेलांत लग्न जावंक नाशिल्ल्या जोडप्यांक रुम बूक करपाची परवानगी दिवची न्हय. अश्यो मागण्यो हेर शारांतल्यान येवपाक लागल्यात, अशी म्हायती ओयोन दिली.
‘ओयो’ कंपनीन कितें म्हणलें?
ओयोचे उत्तर भारत क्षेत्राचे मुखेली पावस शर्मा हांणी म्हणलें, सुरक्षीत आनी जापसालदार अशी आदराची सेवा दिवपाक ओयो कटिबद्ध आसा. आमी वैयक्तीक स्वातंत्र्याचो आदर करता. मात ज्या प्रदेशांत आमचो वेवसाय सुरू आसा, थंयच्या कायद्याक आनी नागरी संघटणांक सहकार्य करप, हीय आमची जापसालदारी आसा. ह्या बदला उपरांत आमी ह्या धोरणाचो आनी ताच्या परिणामांचो नियाळ घेत रावतले.
धारणा बदलपाची येवजण
ओयो विशींची धारणा बदलपाचो हो यत्न आसा अशें म्हणटात. हाचे वरवीं ओयो हॉटेल्स कुटुंब, विद्यार्थी, वेवसायीक प्रवासी, धर्मीक यात्रेकरू आनी एकट्यान प्रवास करपी प्रवाशां खातीर सुरक्षीत आशिल्ल्याचें दाखोवपाक हे नवे बदल केल्यात. ह्या बदलां वरवीं गिरायकांनी ओयोंत चड दीस रावचे आनी परत परत बुकींग करचें असो यत्न ओयो सध्या करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
