भांगरभूंय | प्रतिनिधी
मुरगांव पालिकेक नुस्तें विक्रेत्यांचें आव्हानवास्कोः मुरगांव पालिकेन खारीवाड्यार बेकायदो ठोक नुस्तें विक्री करपी संबंदितांचेर शेनवारा कारवाय केले उपरांत परतून थंय आयतारा संबंदितांनी नुस्तें विक्री करून पालिके मुखार आव्हान उबें केलां. ह्या वेळार तांचे कडेन नुस्तें खरेदी करप्यां कडल्यान थंय गर्दी जाल्ली. संबंदित विक्रेत्या आड मुरगांव पालिके सयत, येरादारी पुलीस, येरादारी खातें हांणी लेगीत कारवाय करपा खातीर सहकारचें असो उलो मुरगांवचे नगराध्यक्ष गिरीष बोरकार हांणी केलां.
शेनवारा कारवाय करून लेगीत नुस्तें विकप्यांनी आयतारा थंय परतून नुस्तें विकपाक सुरवात केली. पूण तांचेर कारवाय करपाक थंय कोणूच आयले ना. ताका लागून लोकां मदीं चर्चा सुरू आशिल्ली.
खारीवाड्यार पयलीं दोन तीन नुस्तें विक्रेते थंय ठोक दरान नुस्त्यांची विक्री करताले. थंय नुस्तें सवाय विकतात, ताका लागून थंय सदांच गर्दी आसता.
पूण आतां थंय विक्रेत्यांची संख्या वाडून सुमार धा पट जाल्या. ह्या विक्रेत्यांक लागूून मार्केटात नुस्तें घेवपाक गिरायक येनात, देखून तांच्या वेवसायाचेर व्हड परिणाम जाल्ल्याचो दावे मार्केटांतल्या नुस्तें विक्रेते करतात. ते खातीर तांणी मुरगांव पालिकेक सोंपो दिवप बंद केला.
शेनवारा नगराध्यक्ष बोरकार हांणी पालिका निरिक्षक, कामगार हांचे सयत खारीवाड्यार बेकायदो नुस्तें विक्री करप्यां आड कारवाय केली. हे कारवायेची नस्तें विकप्यांक आदींच सुलूच लागिल्ल्यान पालिकेच्या कामगारांक व्हड प्रमाणांत थंय नुस्तें विक्री करतना मेळूंक नात. पूण आमची कारवाय सुरूच उरतली, अशें नगराध्यक्ष बोरकार हांणी सांगलें. पूण शेनवारा कारवाय केले उपरांत आयतारा थंय आदले परस चड गिरायकांची गर्दी आशिल्ली. ताका लागून मुरगांव पालिके मुखार आतां आव्हान उबें रावलां.
आयतारा पालिका कार्यालय बंद आसता. त्या वेळार पुलीस येरादारी पुलीस, येरादारी विभागाच्या अधिकाऱ्यांनी संबंदींत विक्रेत्यां आड कारवाय करपा खातीर सादूर रावचें अशें बोरकार हांणी सांगिल्लें. पूण ते उपरांत आयतारा तांकां प्रतिसाद मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
