सां फ्रान्सीस झेवीयर पवित्र कूड दर्शन सुवाळ्याचो समारोप
भांगरभूंय | प्रतिनिधी
फाल्यां सकाळीं निमाणे मीस
पणजी : सेंट फ्रान्सीस झेवीयर हांचे पवीत्र कूडीचें दर्शन घेवपाचो काळ आयज शेनवारा सांजे सोंपलो. फाल्यां आयतारा सकाळीं निमणी प्रार्थना सभा (सोलमन मीस) जातली. लागीं लागीं 80 लाख भक्तांनी पवीत्र कुडीचे दर्शन घेतलें, अशी म्हायती दवदर्शन सुवाळो समितीचे निमंत्रक फादर हेन्री फाल्काव हांणी दिली.
आयतारा सकाळीं साडेणव वराचेर सेंट फ्रान्सीस झेवीयर हांची पवीत्र कूड मिरवणुकीन सी कॅथेड्रल चर्चीतल्यान बॅसिलिका चर्चींत हाडटले. चर्चीचे फादर आनी काय वेंचीक लोकांकूच मिरवणुकेंत वांटेकार जावपाक मेळटलें. उपरांत आर्चबिशप फिलीप नेरी फेर्राव हांच्या फुडारपणा खाला निमणी प्रार्थना सभा जातली. फाल्यां कुडीचें दर्शन घेवपाक मेळचें ना. आयज सांजे दर्शना खातीरचो निमणो दीस आसलो.
सेंट फ्रान्सीस झेवीयर पवित्र कूड दर्शन सुवाळो दरेकी 10 वर्सांनी जाता. 21 नोव्हेंबर 2024 दिसा सुवाळ्याक सुरवात जाल्ली. शेनवार मेरेन दर्शन घेवपी भक्तांचो आंकडो 80 लाखांच्या फुडें गेला, अशें फादर हेन्री फाल्काव हांणी सांगलें. वील चेअर, बुगी तशेंच रावपाची वेवस्था आसले कारणान अंदू गर्दी वाडली अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
