भांगरभूंय | प्रतिनिधी
सुवात एसजीपीडीएची, पालिकेची न्हय; कंत्राटदाराचें म्हणणें
मडगांव: एसजीपीडीएच्या ठोक नुस्त्या मार्केटांत येवपी विक्रेत्यांच्यो गाडयो पालिका वाठारांत उब्यो केले उपरांत सोपो कंत्राटदार पयशे घेता. ही सुवात एसजीपीडीएची आशिल्ल्याची एसजीपीडीएच्या कंत्राटदाराचे म्हणणें आसा. फातोड्डें पुलिसांनी दोनूय पक्षांक पुलीस स्टेशनार आपोवन हाचेर उपाय काडटले.
शुक्रारा सकाळीं एसजीपीडीएच्या ठोक नुस्त्या मार्केटाची भायली सुवात ही मडगांव पालिकेची आशिल्ल्याचें सांगून पालिकेच्या सोपो कंत्राटदारा कडल्यान थंय उब्यो केल्ल्या गाडयां कडल्यानय सोपो कर घेतलो. कांय गाडयां कडल्यान एसजीपीडीएचे कंत्राटदार आनी पालिके कडल्यान नेमिल्ल्या कंत्राटदारां मदीं वाद निर्माण जालो आनी फातोड्डें पुलिसांक हातूंत मध्यस्ती करची पडली.
एसजीपीडीए ठोक नुस्त्या मार्केटा भायले पेव्हर्स घाल्ली सुवात ही एसजीपीडीची आसून ताचेर मडगांव पालिकेचो कंत्राटदार सोपो कर घेवंक शकना. थंय एसजीपीडी कडल्यानूच पयशे घेतले अशें एसजीपीडीएन नेमिल्लो कंत्राटदार साईराज नायक हांणी सांगलें. फातोड्डें पुलिसांकूय हे सुवातेचो मूळ आराखडो दाखयलो आनी तातूंतय पेव्हर्स घाल्ली सुवात ही एसजीपीडीची आशिल्ल्याचें दिसून येत आशिल्ल्याचें तांणी सांगलें. आतां फातोड्डें पुलिसांनी दोनूय पक्षांक पुलीस स्टेशनार आपयल्यात आनी ह्या विशयाचेर थंय निर्णय जातलो अशें नायक हांणी स्पश्ट केलें.
एसजीपीडीए नुस्तें विक्रेते असोसिएशनाचे पदाधिकारी शेख जाहीद हांणी सांगलें, एसजीपीडीए ठोक नुस्त्या मार्केटांत येवपी विक्रेत्यां कडल्यान सोपो कराच्या नांवा खाला पयशां खातीर सतावणूक करतात. मार्केटांतल्यो गाडयो भायर आयले उपरांत फक्त पांच मिणटां भितर बॉक्सां भरून परतून वतात. पूण पालिके कडल्यान नेमिल्ल्या कंत्राटदारा कडल्यान त्या वाहनां कडल्यान पयशे घेतात. एसजीपीडीच्या मार्केटांत वाहनां कडल्यान प्रवेश फी घेत आसतना विक्रेत्यां कडल्यान आतां आनीक पयशे काडपा खातीर कंत्राटदार कार्यरत आसा. हाचेर उपाय काडपा खातीर पालिका, एसजीपीडीए कडल्यान आनी सरकारा कडल्यान निर्णय घेवचो अशी मागणीय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
