भांगरभूंय | प्रतिनिधी
म्हापशें, प्रतिनिधी ः कळंगूटे दर्यादेगेर मुंबयच्या पर्यटक गटाक प्लॅनेट गोवा शॅकाच्या कर्मचाऱ्यांनी बडयले. हाचे आदीं कळंगूटे दर्यादेगेवेल्या मरिना बीच शॅकात रातच्या वेळार जेवणा खातीर आयिल्ल्या आंध्रप्रदेशाच्या पर्यटक गटाक शॅक धनी आनी कामगारांनी बडयल्लें. हांतूत एका पर्यटकाक मरण आयिल्लें.
मेळिल्ले म्हायती प्रमाण, कळंगूटे दर्यादेगेर आशिल्ल्या प्लॅनेट गोवा शॅकाच्या कांय कर्मचाऱ्यांनी पर्यटक नितीन अगरवाल आनी ताच्या इश्टांक बडयलें. हांतूत रोहीत दरोलिया (40, रा. मुंबय) गंभीर जखमी जालो. ह्या प्रकरणांत कळंगूटे पुलिसांनी प्लॅनेट गोवा शॅकांतल्या सुरक्षा रक्षक आनी वेटर आशिल्ल्या नौफाल पी. टी. (28, केरळ), रोहित कुमार (27, हिमाचलप्रदेश), अभिषेक कुमार (24, हिमाचलप्रदेश), विनोद कुमार (31, हिमाचलप्रदेश), सुरिंदर कुमार (28, हिमाचलप्रदेश) ह्या चारुय कर्मचाऱ्यांक अटक केल्या. तांचे आड खून करपाचो यत्न केल्ल्याचो गुन्यांव नोंद केलां. तशेंच शॅकाचो धनी थळाव्या पंचायती वांगड्याचेरूय गुन्यांव नोंद केला. धक्को दिवपी गजाल म्हळ्यार फाटल्या सप्टेंबरांत ह्याच शॅकात गुजरातांतल्या एका पुलिसाक बडयिल्लो.
मेळिल्ले म्हायती प्रमाण, शुक्रारा 3 तारखेक सकाळीं साडेतीन सुमाराक ही घडणूक घडली. लुईझा आलेक्स कुतिन्हो हांचे मालकीच्या प्लॅनेट गोवा शॅकाच्या मुखार मुंबयच्या स पर्यटक वांगड्यांचो गट मजा- मस्ती करतालो. ते वेळार प्लॅनेट गोवा शॅक बंद आशिल्लो आनी मुखार सुरक्षा रक्षक तैनात आशिल्लो. उल्लेख केल्ल्या दुबावीत सुरक्षा रक्षकान पयलीं पर्यटक पंगडा कडेन शुल्लक कारणावेल्यान वाद घालो. देखून तांचे मदीं झगडी जालीं. दुबावितान शॅकात वचून थंय न्हिदिल्ल्या हेर वांगड्यांक आपयले. उपरांत सगळ्यांनी एकठांय येवन ह्या पर्यटक पंगडाचेर हल्लो केलो.
ह्या हल्ल्यांत रोहित दारोलिया हो तरणाटो गंभीर जखमी जालो. जाल्यार ताच्या वांगड्यांक किरकोळ दुखापत जाल्या. जखमींक पयलीं कांदोळे भलायकी केंद्रांत व्हेले. थंयच्यान गंभीर जखमी जाल्ल्या रोहिताक जीएमसींत धाडलो. जाल्यार हेरांक उपचार करुन डिस्चार्ज दिलो.
हे घडणुकेची म्हायती मेळ्ळ्या उपरांत पुलिसांनी घडणुक सुवातेर वचून पंचनामो केलो. तशेंच वयल्या दुबावितांक ताब्यांत घेतले. कागाळदार पर्यटक नितीन अगरवाल हांचे कागाळीचेर आदारून कळंगूट पुलिसांनी दुबावितां आड आयपीसीच्या कलम 109 खाला खून करपाचो यत्न केल्ल्याचो गुन्यांव नोंद केलां. शॅकाच्या हेर दुबावीत कर्मचाऱ्यांचो सोद पुलीस घेतात. पुलीस निरिक्षक परेश नायक हांच्या फुडारपणा खाला उपनिरिक्षक राजाराम बागकार फुडलो तपास करतात.
हाचे पयलींय अशो घडणुकी घडल्यात…
ऑक्टोबर 2024: कळंगूटे गाडी कुशीक व्हरपाक सांगिल्ल्यान पुण्यांतल्या पांच वांगड्याच्या शेख कुटुंबाक टॅक्सी चालकांनी बडयल्ले. ह्या प्रकरणांत पुलिसांनी दोग जाणांक अटक केल्ली.
ऑक्टोबर 2024 : बागातल्या एका क्लबाच्या वांगड्यांनी थळाव्या तरणाट्यांक बडयल्लो. उपरांत तो क्लब प्रशासनान बंद केलो.
सप्टेंबर 2024: प्लॅनेट गोवा शॅकाच्या कर्मचाऱ्यांनी गुजरातांतल्या एका पुलिसाक बडयल्लो.
जानेवारी 2024 : पुणे आनी ठाणेच्या चार पर्यटकांचेर प्रवासी बस चालक आनी वाहकांनी हल्लो केल्लो. रेन्ट अ बायक घेवन वचपी पर्यटकांनी वाट दिवंक नाशिल्ल्यान ही घडणूक घडिल्ली.
डिसेंबर 2024 : कळंगूट दर्यादेगेवेल्या मरिना बीच शॅकात आंध्रप्रदेशाच्या पर्यटक गटाचेर हल्लो. हांतूत एकल्याक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
