भांगरभूंय | प्रतिनिधी
तांचे सयत विनय तेंडुलकार, नरेंद सावयकार मेळ्ळे मुख्यमंत्र्यांक
पणजीः नव्या वर्सांत मंत्रीमंडळांत बदल जाल्ले पळोवपाक मेळटलें. मुख्यमंत्री डॉ. प्रमोद सावंत हांचे कडेन संघटनात्मक वेंचणुके विशीं चर्चा जाल्या अशी म्हायती भाजपाचे प्रदेशाध्यक्ष सदानंद शेट तानावडे हांणी दिली. नव्या वर्सांच्या पयल्याच दिसा श्री. तानावडे हांणी हांचे सयत आदले खासदार विनय तेंडुलकार आनी अॅड. नरेंद्र सावयकार हांणी आल्तीन बंगल्याचेर डॉ. सावंत हांची भेट घेतली. वीजमंत्री सुदीन ढवळीकार हांणीय तांची भेट घेतिल्ल्याची म्हायती सूत्रांनी दिली.
संघटनात्मक वेंचणुकेचेर चर्चा जाल्या अशें सांगून मंत्रीमंडळ फेरबदलाचो संकेत तानावडे हांणी बसके उपरांत दिलो. तेंडुलकार आनी सावयकार हांणी ही सदिच्छा भेट अशें सांगून चर्चेचो तपशील उक्तावपाक न्हयकार दिलो. मंत्र्या वांगडा भाजपाचे तीन फुडाऱ्यांनी एकाच वेळार भेट घेतिल्ल्यान बसके फाटले गूढ वाडला. नव्या वर्साचीं परबीं दिवपाक हांवें मुख्यमंत्र्यांची भेट घेतली. दुसरो खंयचोच विशय नाशिल्लो. हेर विशयांचेर चर्चा जाली तरी सगळें सांगपा सारकें ना अशें तेंडुलकार हांणी सांगलें.
मंडळ अध्यक्षाची वेंचणूक 10 जानेवारी पयलीं जावंक जाय. फुडले वेंचणुकेंत पक्षाक परतून सत्तेर हाडपा खातीर पक्षाची संघटना घटमूट करपाची गरज आसा. मुख्यमंत्री सावंत हांचे कडेन संघटनात्मक वेंचणुके विशीं चर्चा जाली अशें तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
