भांगरभूंय | प्रतिनिधी
एका आदेसाक जमले 30,300 रुपया
भांगरभूंय । प्रतिनिधी
वास्कोः मुरगांव पालिकेन भाजी मार्केटांतल्या विवीध विक्रेत्यां कडल्यान कोयर शुल्क एकठांय करपाच्या कामाक परतून सुरवात केली. सोमारा दनपार मेरेन 30 हजार 300 रुपया एकठांय केल्ले. खूबश्या विक्रेत्यां कडल्यान बरो आदार मेळटा, पूण कांय जाण मुरगांव पालिकेच्या पंगडाक पळोवन आपलीं दुकानां कांय वेळार खातीर बंद करून आपालिपाचो खेळ खेळटात. कितेंय केलें तरीय तांची शुल्का पासून सुटका जावची ना. तांकां हेरां वरींच कोयर शुल्क दिवचें पडटलें, अशें पालिकेन स्पश्ट केलें.
मुरगांव भाजी मार्केटांत भाजी, फळां, नाल्ल, भुसारी तशेंच हेर विवीध विक्रेते आसात. तांचो कोयर उखलपा खातीर मुरगांव पालिका थारावीक शुल्क घेता. खूबशे विक्रेते कोयर शुल्क दिनात, तशेंच मुरगांव पालिका लेगीत तें शुल्क घेवपा संबंदांत गंभीर ना. मात तांचो कोयर उखलपाचें काम मुरगांव पालिके वतीन करतात. विक्रेते कोयर शुल्क दिनाशिल्ल्यान म्हयन्याक 80 ते 90 हजार रुपयांचो महसूल बुडटा.
ह्या प्रकरणाची दखल घेवन मुरगांव पालिकेचे मुख्याधिकारी दीपेश प्रियोळकार हांणी 23 डिसेंबराक भाजी मार्केटांतल्या विक्रेत्यां कडल्यान कोयर शुल्क एकठांय करपाक सुरवात केल्ली. त्या वेळार तांचे वांगडा नगराध्यक्ष गिरीष बोरकार, नगरसेवक नारायण बोरकार, नगरसेवक दामू कासकार, नगरसेवक दामू, पालिका अधिकारी संध्या आनी हेर पालिका निरिक्षक आशिल्ले. त्या वेलार फकत देड वरांत 26 हजार रुपया एकठांय केल्ले. ते उपरांत नातलांक लागून ही मोहीम बंद पडिल्ली. ती मोहीम सोमारा परतून सुरू केली. ह्या वेळार नगरसेवक नारायण बोरकार, अधिकारी संध्या तशेंच पालिका निरिक्षक हाजीर आशिल्ले. तांणी विक्रेत्यां कडल्यान कोयर शुल्क एकठांय करपाक सुरवात केले उपरांत विक्रेत्यांनी प्रतिसाद दिवन कोयर शुल्क दिलें. ताका लागून फकत दोन वरांत 30 हजार रुपया परस अदीक शुल्क एकठांय केलें. सांजेच्या आदेसाक पंगडान फळ विक्रेत्यां कडल्यान कोयर शुल्क एकठांय करपाक सुरवात केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
