भांगरभूंय | प्रतिनिधी
डॉ. चंद्रकांत शेट्येः दिवचले उदरगतीच्या कामांक सुरवात
भांगरभूंय । प्रतिनिधी
दिवचलः दरेका घरांत समृद्धी होच आमचो ध्यास. तुमी वेगवेगळीं कामां सुचयात, आमी ताका चालना दिवचे खातीर फाटपुरवण करतले. सगळे नगरसेवक संघटीत आसात. आमचें भाजपा कडलें नातें सामकेंच घटमूट आसा. ते खातीर डबल इंजिनाच्या माध्यमांतल्यान दिवचल मतदारसंघ आदर्श करपाचो ध्यास आसा, अशें आमदार डॉ. चंद्रकांत शेट्ये हांणी सांगलें.
शेनवारा दिवचल पालिका प्रभाग 11 आनी 12 त सुमार पांच विवीध उदरगतीच्या येवजण्यांक सुरवात डॉ. शेट्ये आनी हेर मानेस्तांचे हांचे हस्तुकीं जाली. त्या वेळार ते उलयताले. ह्या वेळार नगराध्यक्ष कुंदन फळारी, सतीश गांवकार, तनुजा गांवकार, रियाज बेग, अनिकेत चणेकार, अपर्णा फोगेरी, रंजना वायंगणकार, सुखदा तेली, गुंजन कोरगांवकार, विश्वास सरदेसाय, आझाद कडकडे हांचे सयत साबार मानेस्त हाजीर आशिल्ले.
संघटीत शक्तीक लागून उदरगतीक व्हड चालना मेळटा. भाजपा कडेन आमचें नातें खुबूच घटमूट आसा. मुख्यमंत्री पुराय आदार करतात. कांय विरोधक गरजेभायर आपले पद्दतीन राजकारण करपाचो यत्न करतात. मात सगळ्यांनी संघटीत रावून उदरगतीचे प्रक्रिये वांगडाच दिवचलचें राजकारण लेगीत अदीक घटमूट करचे खातीर संघटीत रावपाचो निश्चेव केला, अशें डॉ. शेट्ये हांणी सांगलें.
नगराध्यक्ष फळारी हांणी सांगलें, आमदाराच्या आदारान मतदारसंघाक उदरगतीची गती मेळ्ळ्या. शारांत लेगीत साबार प्रकल्प चालीक लागल्यात. उदरगतीच्यो येवजण्यो चालीक लायतना दरेकल्यान आदार करपाची भुमिका घेतिल्ल्यान गतीमान उदरगत चल्ल्या.
ह्या वेळार सतीश गांवकार, रियाज बेग हांणी सांगलें, आमदार नेटान उदरगतीचीं कामां करता. दरेका कामाची फाटपुरवण केल्ल्यान शारांतल्या सगळ्या प्रभागांनी उदरगतीक गती मेळ्ळ्या. पालिका निधी आनी सरकाराच्या निधींतल्यान सुमार 80 लाखांच्या येवजण्यांक मानेस्तां हस्तुकीं सुरवात जाली. ह्या वेळार थळावे लोक लेगीत व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
