भांगरभूंय | प्रतिनिधी
वजन माप विभागाच्या वास्को कार्यालयान केली तपासणी
भांगरभूंय | प्रतिनिधी
वास्को: वजन माप विभागाच्या वास्को निरिक्षक कार्यालयान सोमवारा कुठ्ठाळेच्या एचपीसीएल गॅस एजन्सीचे गाडयेंतल्या 53 घरगुती गॅस सिलिंडरांची अचकीत तपासणी केली. तेन्ना 31 सिलिंडरांनी 750 ग्राम ते 1.8 किलोग्राम गॅस उणी आशिल्ल्याचें कळटाच ते सिलिंडर जप्त केले. हे विशीं संबंदीत कंपनीक कळयलां. उपरांत कंपनी ह्या सिलिंडरांची तपासणी करून संबंदीत एजन्सी आड योग्य कारवाय करतली. मजगतीं, गिरायकांनी एलपीजी घरगुती गॅस सिलिंडर घेतना सदांच वजन करुनूच घेवचे, अशें वास्को कार्यालयाचे निरिक्षक लिलाधर कुंभारजुवेंकार हांणी सांगलें.
कुठ्ठाळेच्या संबंदीत एजन्सीचे गाडयेंत गिरायकांक डिलिव्हरी करपा खातीर 53 घरगुती गॅस सिलिंडर दवरिल्ले. वास्को कार्यालयाचे निरिक्षक कुंभारजुवेंकार हांच्या मार्गदर्शना खाला हेर कर्मचारी केवल देसाय, दामोदर पाऊसकार, ईझेबियो गोम्स, रत्नाकर फळदेसाय हांणी ह्या गॅस सिलिंडरांची तपासणी केली. तेन्ना 31 गॅस सिलिंडरांचें वजन उणें आशिल्लें. घरगुती गॅस सिलिंडरांचें वजन 14.2 किलोग्राम आसता. गॅस सिलिंडराच्या वट्ट वजनांत 150 ग्राम मेरेन परवानगी योग्य मानतात. तशेंच कुठ्ठाळेच्या ते एजन्सी वतीन डिलिव्हरी करपाक व्हरपी गॅस सिलिंडरांचे तुटींत खुबूच गोंदळ दिसलो. हे 31 गॅस सिलिंडर वजन माप कायदो 2009 चें कलम 15 प्रमाण जप्त केले. हे विशीं योग्य पंचनामो केलो. हे आदीं झुआरीनगरांतले गॅस एजन्सीचेर अचकीत धाड घातिल्ली आनी सिलिंडरांची तपासणी केल्ली. तेन्नाय अशेंच चित्र सामकार आयिल्लें. उपरांत हे एजन्सीची चवकशी सुरू केली. मजगतीं थंयच्या सिलिंडरांची डिलिव्हरी करपाचें काम हेर दोन एजन्सींक दिल्लें. आतां कुठ्ठाळेच्या ते एजन्सीच्या गॅस सिलिंडरांचें वजन उणें आयिल्ल्या हो प्रस्न परत मुखार आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
