भांगरभूंय | प्रतिनिधी
नवी दिल्ली, खबरां संस्था ः कोरोना काळांत नागरिकांक बेगोबेग सुविधा दिवपा खातीर 2020 वर्सा ‘पीएम केअर फंड’ सुरू केल्लो. ते उपरांत 2019-20 ते 2021-22 ह्या काळांत सरकारी आनी खाजगी कंपनींनी ह्या निधींत खूब योगदान दिलें. पीएम केअर निधी खातीर 2022-23 अर्थीक वर्साय 912 कोटी रुपया मेळ्ळ्यात. हाचो अर्थ कोरोना म्हामारी उपरांत लेगीत पीएम केअर निधी खातीर देणगीं चालूच आसा.
पीएम केअर फंडाक 2022-23 वर्सा स्वयंसेवी योगदान म्हणून 909.64 कोटी रुपया आनी परदेशी योगदान म्हणून 2.57 कोटी रुपया मेळळ्यात. 912 कोटी रुपयांची देणगी सोडल्यार पीएम केअर फंडाक व्याज उत्पन्न म्हणून 170.38 कोटी रुपया मेळ्ळ्यात. तातूंतले 154 कोटी नेमान खात्याचेर व्याज आनी 16.07 कोटी विदेशी खात्यांतल्यान मेळ्ळ्यात.
वितरणा विशीं पीएम केअर निधीन 2022-23 अर्थीक वर्सा वट्ट 439 कोटी रुपया वितरित केल्यात. भुरग्यां खातीर 346 कोटी रुपया, जाल्यार 99,986 ऑक्सिजन कॉन्सेंट्रेटर खरेदी करपा खातीर 91.87 कोटी आनी कायदेशीर प्रकिया खातीर 24 हजार रुपया खर्च केलां. तशेंच 2022-23 अर्थीक वर्साच्या अखेरेक पीएम केअर फंडाचो क्लोजिंग बॅलन्स 6,284 कोटी रुपया आशिल्लो. जो अर्थीक वर्स 2021-22 च्या तुळेंत 16 टक्क्यांनी चड आशिल्लो.
मजगतीं, कोरोना म्हामारी उपरांत देशांत लॉकडावन जाले उपरांत 27 मार्च 2020 दिसा पीएम केअर निधीची नोंदणी कायदो 1908 खाला ‘भौशीक धर्मादाय ट्रस्ट’ म्हूण नोंदणी जाल्ली. प्रधानमंत्री पीएम केअर फंडाचे पदसिद्ध अध्यक्ष आसात. तशेंच संरक्षण मंत्री, गृहमंत्री आनी अर्थ मंत्री हें ह्या निधीचे पदसिद्ध विश्वस्त आसात. प्रधानमंत्र्यान पीएम केअर फंडाच्या विश्वस्त मंडळाचे अध्यक्ष म्हूण न्यायाधीश के. टी. थॉमस (निवृत्त) आनी कारिया मुंडा हांची विश्वस्त म्हणून नेमणूक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
