भांगरभूंय | प्रतिनिधी
मुरगांव पालिकेच्या सीसीटीव्ही कॅमेऱ्यांत कैद
वास्को: मुरगांव पालिकेच्या कोयर संकलन केंद्रा मुखार रातच्या वेळार पार्टींतलो वेगळोवेगळो कोयर उडयत आशिल्ल्याचें मुरगांव पालिकेचे सीसीटीव्ही कॅमेऱ्यांत कैद जाल्ल्या एका मनशाक धा हजार रुपयांचो दंड भरचो पडलो. हाचे पसून हेरांनी धडो घेवचो तशेंच मुरगांव पालिकेन आपल्या कॅमेऱ्यांची संख्याय वाडोवपाची गरज आसा अशी प्रतिक्रिया लोक उक्तायतात.
मुरगांव पालिकेच्या कुन्हा चौकांतल्या चिकन मार्केटा लागसार कोयर संकलन केंद्र आसा. थंय शार वाठारांतलो कोयर एकठांय करून संकलन करतात. उपरांत तो कोयर सड्यार कोयर प्रक्रिया प्रकल्पांत व्हरतात. थंय रातच्या वेळार कांय केटरर्स तशेंच हेर लोक आपलो कोयर प्लास्टीक आयदनांतल्यान वा गार्बेज बॅगेंतल्यान हाडून उडयतात. ताका लागून थंय घाण पातळटा.
पालिकेक कोयरा खातीर कांय रक्कम दिवपा बदला संबंदीत व्यक्ती कोयर चारचाकी, दुचाकी वाहनांतल्यान हाडटात आनी सर्रासपणान थंय उडयतात. हे संबंदी दखल घेतना नगरसेवक आनी मुरगांव पालिका मंडळाचे कोयर वेवस्थापन समितीचे अध्यक्ष नारायण (दिलीप) बोरकार हांणी थंय कॅमेरा लायला. ह्या प्रकरणांत नगरसेवक रामचंद्र कामत हांणी सहकार्य केलें.
हो कॅमेरा लायिल्ल्याचें जांकां खबर आशिल्लें तांणी कोयर उडोवपाचें बंद केलें. पूण सडा हांगासरलो एक केटरर्स पार्टींत एकठांय जाल्ल्यो पत्रावळ्यो, कप्स, भायर उडोवपाचें आशिल्लें अन्न बी एका व्हड प्लास्टीक आयदनांत घालून आपल्या कामगारा सयत दुचाकीन थंय आयलो. ताणें तो कोयर, कोयर संकलन केंद्रा मुखा वेल्या रस्त्यारूच उडयलो. उपरांत ते दोगूय दुचाकीन गेले.
ही घडणूक थंय लायिल्ल्या सीसीटीव्ही कॅमेऱ्यांत कैद जाली. उपरांत त्या वाहनाचो क्रमांक सोदून धनयाक आपोवन हाडलो. ताका सीसीटीव्ही कॅमेऱ्यांतलो व्हिडियो दाखयलो आनी ताका धा हजार रुपयां दंड भरपाक लायलो.
मुरगांव पालिकेन अशे तरेचे कॅमेरे कांय मेजक्याच सुवातांनी आशिल्ल्या कोयर संकलन केंद्रांनी लावचें. जेणे करून थंय कोणूय रातच्या वेळार फास्ट फूड गाड्या वेलो तशेंच पार्टींतलो भायर उडोवपाचें आशिल्लें अन्न आनी हेर कोयर उडयतात आसत जाल्यार तांकां कॅमेऱ्यां वरवीं धरूंक मेळटलें. हाका लागून पालिकाक दंडा पसून महसूलय मेळटलो तशेंच अशे रितीन कोयर उडोवप्यां खातीर एक धाक उरतलो अशी प्रतिक्रिया लोक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
