भांगरभूंय | प्रतिनिधी
नातलां म्हणल्यार खुशालकाय, उजवाड, मोग, शांती वांटप आदीं. शांतीचो कुंवर बाळक जेजू जल्मला म्हणटकच पुराय संवसारार ही खुशालकाय आनी उजवाड हेंच जावन आसा. कारण कातोल्क, क्रिस्तावांक जेजू क्रिस्ताचो जल्म व्हड खुशालकायेन समारंभूक गोरवाच्या गोठ्यांत जल्मल्लो. जेजू राजांचो राजा आसलो. तो जल्मल्लो तेन्ना इझ्रायलांत हॅरोड पातशायाचें राज्य चलतालें. एक नवो राजा जल्मला, अशें ताच्या कानार पडलें. तेन्ना तो भियेलो. आपलो जागो फाल्यां तो घेतलो अशीं भिरांत ताचे काळजांत रिग घेवन रावली. हाका लागून ताणें जेजू जल्मल्लो. त्या वाठारांतल्या दोन वर्सां आनी सकला पिरायेच्या भुरग्यांक जिवेशीं मारलीं. जेजू कसलो पातशाय जातलो, हें पारखूंक हॅरोड पातशाय कमी पडलो.
फाटल्या दोन हजार वयर वर्सां सावन जेजूच्या जल्माची परब म्हणल्यार नातलां. क्रिस्ती समाज समारंभता. नातलाचो मौसम म्हणल्यार सगळ्या वाठांनी उमेदीच उमेद. 50- 60 वर्सां फाटलीं म्हणल्यार म्हज्या भुरगेपणा वेलीं नातलां आतांच्या नातलां परस वेगळीं आशिल्लीं. देझेंब्रराचो म्हयनो सुरू जाता म्हणल्यार कुडींत वेगळीच उमेद निर्माण जाताली. आतांय जाता. घरांत कुंसवार करपाक सुरू जातालो. गोठो करूंक गंव किल्लूंक घालताले. दोंगरार वचून करड हाडप, सुरा झाडाचे खांदे कातरुन हाडप….. घरा कडेन सैमीक सुरापायेक सर जावपी एक सोबीत सुंदर गोठो तयार जावंक लागतालो. पूण तेन्नाचे गरिबेक लागून सगल्यां लागीं गोठो करूंक जायनासलें. तेन्ना चडशे जाणांक नातलांची मुखेल तयारी म्हणल्यार नखेत्र जावन आसतालें. तें घरा कडेन कोंडो हाडून तयार करताले. खुबदां कोंड्यांच्यो बारीक बडयो तयार करतना, तांची किसरां हातांक लागून घावे पडटाले. रगत व्हांवतालें. पूण तातूंत नातलांची उमेद, उर्बा मात उणी कमी जाय नासली. उरफाटें जाल्यार ती आनीकूय वाडटाली. मना काळजांत एकूच विचार घट्ट गांठ मारून आसतालो. जेजू गोरवांच्या गोठ्यांत जल्मुचो आसा. आनी ताका जाता तितले उमेदीन येवकार दिवपाक जाय. धा बडयो तासून निवळ केल्या उपरांत तयार केल्ल्या बडयांच्या आकारा प्रमाणें एक सुंदरशें नखेत्र तयार जातालें. तें मागीर बाजारांत सावन फोली हाडून न्हेंसयताले. नखेत्र तयार जातकच एक जाता तितलो लांब कोंडो घराच्या खंयच्याय भागाक उबो बांदताले. दर्जी सुताचीं बिश्टिनां उजार करतात, तसलींच पूण रिलाक सूत गुंठालायिल्लीं. बिश्टिनां त्या काळार मेळटालीं. हीं खाली रिलां मागूंक दर्जींक मस्को मारचो पडटालो. हें रिल त्या कोंड्याच्या वयल्या पोंतार बांदून दोरयेच्या आदारान नखेत्र ताचेर चडयताले. नातलांचो मौसम चालू आसा मेरेन तें सांजेचें देंवून तातूंत पेटयल्लो पेत्रोलाचो दिवो दवरताले. केन्नाय रातचें वारें सुट्टले जाल्यार दिवो आडवो पडून नखेत्र लासून वतालें.
आतां घरा- घरांनी गोठे करतात. चडशे गोठे बाजारांतल्यान तयार केल्ले हाडून घरांत दवरतता. नखेत्रां बाजारांतलीं हाडटात. त्या काळार बिजली घरा-घरांनी पावूंक नाशिल्ली, म्हणटकच आताचें परीं बिजलेच्या दिव्यांची सजावट बिल्कुल आसनासली. आतां नातलां दिसांनी रातचीं घरां लायटीच्या दिव्यांनी सगळींच झगझगतात- लिकलिकतात.
तेन्ना पयस आशिल्ल्यांक नातलांचे संदेस कार्डांतल्यान पाठयताले. कांय पावटीं एका घरांतल्यान 50- 60 कार्डां भायर वतालीं. आनी तितलींच बदल जावन परत येतालीं. हीं सगळीं कार्डां घरांत एके दोरयेक बांदून ताचेर घालतालीं. चड कार्डां धांडप आनी परत येवप म्हणल्यार खुशालकाय आनीकूय वाडटाली. नातलांचो मौसम म्हणल्यार टपाल खात्यांतल्या पोस्टमेनाक उठा बशीं काडचे दीस जाताले. आतां एकूय दुस-या पोंतार व्हाॅट्सअॅप आनी हेर माध्यमांतल्यान शंबरांनी सोय-याक, इश्ट मित्रांक थोड्या वेळा भितर पाठयतात. नातलां मनोवपाची पद्दत बदलत आसा पूण खुशालकाय आनी उमेद आजूनय तीच आसा.
लिप्यांतर ः विशाल सिनाय खांडेपारकार
अँथनी मिनेझीस
9822980231
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
