भावाचो भावाचेर कोयत्यान हल्लो

भांगरभूंय | प्रतिनिधी

अडवयची घडणूक; पुलिसांचेर फातर शेंवटिले, पुलिशेच्या गाडयांची मोडतोड

वाळपयः सत्तरी म्हालांतल्या भिरोंडें पंचायत वाठारांतल्या अडवय कुमारवाड्यार केशव कुंकळकार हाणें पुलिसांचेर फातर शेंवटिले तशेंच भावाचेर कोयत्यान हल्लो केलो. तशेंच पुलिशेचे गाडयेची (जीए 07 जी 1637) मोडतोड केली. गाडयेचें सुमार लाखभर रुपयांचें लुकसाण जाल्ल्याचो अदमास आसा. सुमार देड वराचे घडामोडी उपरांत वाळपय पुलिसांनी केशवाक अटक करून पुलीस कोठडेंत दवरलो. ह्या संबंदांतली कागाळ करपाचें काम राती उसरां मेरेन चालू आशिल्लें. केशवाचेर जीव घेवपाचो यत्न केल्ल्याचो गुन्यांव नोंद करतले, अशें पुलीस अधिकाऱ्यांनी स्पश्ट केलां.

मेळिल्ले म्हायती प्रमाण केळव हो बिरेस्तारा रातच्यान घरांत व्हडा व्हडान बोवाळ मारतालो. सकाळच्यानूच तो हातांत कोयतो घेवन त्या वाठारांत भोंवतालो. ताका लागून लोकां मदीं भिरांतीचें वातावरण निर्माण जाल्लें. खूब जाणांनी ताका आडावपाचो यत्न केलो, पूण तो तांच्या आंगार धांवून वतालो. ताच्या भावान संजीव कुंकळकारान ताच्या हातांतलो कोयतो काडून घेवपाचो यत्न केलो. जाल्यार ताणें संजीवाचेर कोयत्यान हल्लो करून ताका जखमी केलो.

ही खबर वाळपय पुलिशेक दिले उपरांत पुलीस स्टेशनाचे अधिकारी ताकतिकेन घडणुकेचे सुवातेचेर पावले. मात धारेच्या कोयत्याचो भंय दाखयले उपरांत तेवूय पळून गेले. हे संदीचो फायदो घेवन केशवान पुलीस गाडयेची मोडतोड केली. गाडयेचे सगळे हारशे फोडले, तशेंच टायरांचेंय लुकसाण केलें.

मजगतीं, त्या वाठारांत तणावाची स्थिती निर्माण जाले उपरांत वाळपयचे पुलीस निरिक्षक प्रज्योत फडते, उपनिरिक्षक स्नेहा गांवस आनी हेरांनी घडणुकेचे सुवातेचेर येवन केशवाक धरलो. ह्या वेळार केशवान पुलिसांचेर फातर शेंवटिले. तातूंत कांय पुलीस जखमी जाले.

केशव कुंकळकार हो मनोरुग्ण आसा. खूब खेपे तो असोच वागता, अशी म्हायती थळाव्या लोकांनी दिली. संजील कुंकळकार हांच्या तोंडाक खूब घावे जाल्यात. ताचेर वाळपय सरकारी समाजीक हॉस्पिटलांत उपचार चालू आसात, अशी म्हायती मेळ्ळ्या.