भांगरभूंय | प्रतिनिधी
पणजीः सिद्दिकी सुलेमान खान हाणें जारी केल्ल्या व्हिडियो प्रकरणांत आपाचे गोंय प्रदेश अध्यक्ष अॅड. अमीत पालेकार हांची पोरणें गोंय पुलीसांनी दुसरे खेपे चवकशी केली. ह्या वेळार आपाचे वाल्मिकी नायक तशेंच हेर कार्यकर्त्यांनी पुलीस स्टेशनार हाजेरी लायली.
हाचे पयलीं सोमारा लेगीत अॅड. अमीत पालेकार हांची चवकशी जाल्ली. जमीन हडप प्रकरणांतलो आरोपी सिद्दीकी सुलेमान खान हाका सोमारा केरळा सावन गोंयांत हाडलो. ताका न्यायालयान रिमांड जारी केला.
पुलीस कोठयेंतल्यान पळून वतकच ताणें फाटल्या आयतारा व्हिडियो जारी केल्लो. एनकावंटर करपाची धमकी दिवन पुलिसांनी आपणाक हुबळी हाडून सोडलो असो आरोप ताणें व्हिडियोंत केल्लो. ह्या व्हिडियोचो पेन ड्रायव्ह अॅड. अमीत पालेकार हांकां मेळ्ळो. उपरांत सुनील कवठणकार हाणें तो माध्यमां मेरेन पावयलो. ह्या व्हिडियो प्रकरणांत अॅड. अमीत पालेकार हांची चवकशी सुरू आसा. सिद्दिकी सुलेमान खान हाणें जो दुसरो व्हिडियो व्हायरल केला ते वरवीं भाजप फुडारी आपलो बचाव करपाचो येत्न करतात असो आरोप अॅड. अमीत पालेकार हांणी केला. हो व्हिडियो खंयच्यान आयलो ताची चवकशी करपाक जाय. सुलेमान हाणें पुलिसांचेर जे आरोप केल्यात तांची चवकशी कित्याक जायना, असोय प्रस्न अॅड. पालेकार हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
